السی ویل آتا ایسری ضلعی انتظامیہ نا اولیکو اولیت ءِ ایڈیشنل ڈپٹی کمشنر نوشکے‘محسن لاشاری

نوشکے، ایڈیشنل ڈپٹی کمشنر نوشکے محسن لاشاری پارینے کہ دوئی وسیلہ غاتے کاریم اٹ اتسا السی ویل آتے اوفتا درگہ غا ایسر کننگ ضلعی انتظامیہ نا اولیکو اولیت ءِ‘ دا مسخت کن ہر تُو آ غاو دیوان اڈ تننگ انگ ءِ‘ ہراڑے الس تینا ویل آتے تعلقدار کمامدار آتا مون آ پیش کننگ کیرہ۔ دا خیال آتا درشانی ءِ او پریس کلب نوشکے نا صحافی تا ڈل اسے تون اوڑدہی نا وخت آ ہیت وگپ کرسا کرے۔ اوڑدہی ٹی صحافیک اودے صحافتی زمواری تا پوروی نا وخت آ مون تروک چیلنج، حوال تا وخت آ پک کننگ کن بھرمی میکنزم، ضلعی انتظامیہ و میڈیا نا نیام اٹی رابطہ کاری، علاقائی ویل و ایلو باندات آتیان جم معلومدار کریر‘ او پارے کہ ضلعی انتظامیہ ءِ نوشکے شار اتون اوار مر انگا علاقہ غاتیٹی رہینگوک الس ءِ مون تروک ویل و خواری تا جوان سماءِ‘ دا ویل آتا ضلعی کہول آ ایسری کن ڈپٹی کمشنر نا کماشی ٹی گام گیج کننگ انگ ءِ وخت اس کہ صوبائی یا بنجائی حکومت نا کاریمی دنگ اٹ بروک ویل آتا ایسری کن تعلقدار کمامدار آتتون رابطہ کننگ انگ ءِ او پارے کہ ضلع نوشکے نا ربیدگی زیبائی، ایلمی و تین پہ تینی ہم آہنگی نا چاگڑد ءِ برجا تخنگ و السی ویل آتا ایسری کن کل تعلقدار تپہ غاتے اسیجائی کوشست کروئی تمک۔ ضلعی انتظامیہ نا کنڈ آن سرکاری محکمہ غاتے الس نا مون آ پرسجو جوڑ کننگ و ویل آتا دمدستی ایسری کن باقاعدگی اٹ غاو دیوان اڈ تنن انگ ءِ‘ او پارے کہ الس تینا ویل و خواری تا ایسری کن ڈپٹی کمشنر، ایڈیشنل ڈپٹی کمشنر و اسسٹنٹ کمشنر نا دفتر آتتون رابطہ کننگ کیک۔ او پارے کہ ساڑی دور میڈیا نا ءِ‘ صحافی ویل آتا نشاندہی، حکومت نا راہشونی و الس ءِ وخت آ راست معلومدری تا فراوانی ٹی اہم کڑد ادا کننگ کیرہ، ہراڑان غلط فہمی و کنفیوژن نا چٹفنگ اٹی ہم کمک رسینگک‘ او باوری کرفے کہ ضلعی انتظامیہ حوال تا وخت آ پک کننگ‘ معلومداری تا فراوانی و گچین رابطہ کاری نا بابت صحافی تتون وس انا کچ آ کمک کیک۔