پاکستان و بوسنیا و ہرزیگووینا ناتعلقداری تے شریداری ٹی بدل کروئی ءِ،وزیراعظم شہباز شریف

نیویارک، وزیراعظم محمد شہباز شریف بوسنیا و ہرزیگووینا تون پاکستان نا تاریخی، خڑکی و ایلمی تعلقداری تااہمیت نا درشانی ءِ کرسا دا تعلقداری تے واپار و اقتصادی کمکاری آ تالان سوگو و وسیع البنداو شریداری ٹی بدل کننگ نا است خواہی نا درشانی ءِ کرینے۔ وزیراعظم آفس نا میڈیا ونگ آن جاری بیان نا رداٹ وزیراعظم محمد شہباز شریف بوسنیا و ہرزیگووینا نا صدارتی کونسل نا چیئرمین ڈاکٹر ڈینس بیچیرووچ تون اوڑدہی کرے۔ اقوام متحدہ نا جنرل اسمبلی نا دیوان نا وخت آ مروک اوڑدہی ٹی ہڑتوم آ راہشونک پاکستان و بوسنیا و ہرزیگووینا نا نیام اٹ ہڑتوم آ کنڈآتا تعلقداری تا کل پلوآتا جاچ ءِ ہلکر، ہراٹی سیاسی، اقتصادی، دفاعی کمکاری، کسبکار ہیومن ریسورس نا ہن وبر‘ تعلیم و دودوربیدہ نا بشخ آک اوار ءُ۔ ہڑتوم آ سرکڑدہ غاک ہڑتوم آ کنڈآتا است خواہی نا علاقائی و جہانی باندات آتیا ہم گپ و تران کریر۔ وزیراعظم بوسنیا و ہرزیگووینا تون پاکستان نا تاریخی، خڑکی و ایلمی تعلقداری تااہمیت نا درشانی ءِ کرسا دا تعلقداری تے واپار و اقتصادی کمکاری آ تالان سوگو و وسیع البنداو شریداری ٹی بدل کننگ نا است خواہی نا درشانی ءِ کرے۔ وزیراعظم بوسنیا و ہرزیگووینا نا وتواجہی و علاقائی سالمیت کن پاکستان نا پبی مخ تفی نا درشانی ءِ کرسا زور شاغا کہ علاقائی سوگوی اسہ سوگو، و شونہال بوسنیا و ہرزیگووینا تون گنڈوک ءِ۔ بوسنیا و ہرزیگووینا نا یورپی یونین اٹ اواری نا مذاکرات نا باضابطہ بنا غا ڈاکٹر ڈینس بیچیرووچ ءِ مبارکبادی ترسا وزیراعظم پارے کہ پاکستان بوسنیا و ہرزیگووینا ءِ یورپی و دیکی بلقان نا منڈی تسکان پاکستانی گڑاتا رسینگ کن ڈیہہ اٹی واپار و علاقائی رابطہ غاتا گمانی ہند انا وڑ اٹ ہرک۔ ڈاکٹر ڈینس بیچیرووچ دیکی ایشیا و خلیجی علاقہ ٹی بے چیٹی ٹی کمتی و حالیت آتے مست آنبار اتنگ کن پاکستان نا خیرخواہی کڑد انا ستاءِ کرے۔ ڈاکٹر ڈینس بیچیرووچ سندھ طاس معاہدہ ءِ معطل تخنگ نا گام انا کانود آن چَپ حیثیت نا بابت پاکستان نا موف نا ہم پبی مخ تفی ءِ کرے۔ ہڑتوم آ راہشونک پاکستان و بوسنیا و ہرزیگووینا نا نیام اٹ ہڑتوم آ کنڈآتا تعلقداری تے پین مونی دننگ کن تین پہ تینی رابطہ ٹی سلنگ و اوار ی اٹ کاریم کننگ آ امنا کریر۔ دا بابت بروک آ دے تیٹی ہڑتوم آ ملک آتا نیام اٹ بڑزکو کہول انا دورہ غاتا باندات ءِ ہم مونی دننگک