پشتون قوم انا تاریخ قدیم و شانی آ دودوربیدہ نا امین ءِ،گورنر بلوچستان جعفر خان مندوخیل

کوئٹہ، گورنر بلوچستان جعفر خان مندوخیل پشتون کلچر ڈے انا وخت آ مچ آ پشتون قوم خاص وڑ اٹ ورناتے مبارکبادی ترسا پارینے کہ او تینا تاریخ آن روشنا، تینا دودوربیدہ تون درستی راستی‘ علم آن طاقت و تینا آخبت آن اومیت دوئی کیر۔ ننے ہندن ءُ راج اسے جوڑ کروئی ءِ ہراڑے تینا دودوربیدہ نا ماس تتون گنڈوک مننگ و پوسکن آدنیا نا خواست آتتون ہم گرنچی اسہ ایلو نا ضد مف، بلکن اسہ ایلو نا پورو کروک جوڑ مریر۔ انسانی تہذیب نا سفر اصل اٹ انسان نا پدریسہ تخلیقی، فکری و راجی شونداری نا داستان ءِ۔ لوز کلچر نا ماسک لاطینی زبان نا لوز ‘کلتور’ تون گنڈوک ءُ، ہرانا بنداوی مفہوم ڈغارنا دسنگ و آبادی تون تعلقداری تخک۔ وخت اتون ہندا تصور انسانی ذہن، راج و تہذیب نا جوڑ و شونداری اسکان تالان مس۔ انسان تینا ہن و بر، علم، فن، زرگزران و راجی ادارہ غاتے پدریسہ شونداری تس و دودوربیدہ آن تہذیب اسکان نا سفر ءِ پورو کرے۔ اینو انفارمیشن ٹیکنالوجی و پوسکن آمواصلاتی وڑک دنیا ءِ اسہ ایلو نا پین خڑک اتسا جہانی تہذیب نا ارتقا نا رفتار ءِ پین ترند کرینو۔ پشتون کلچر ڈے انا وخت آ تینا کلہو اٹ پارینے کہ دودوربیدہ ہرقوم اسے نا شناخت، اجتماعی یادداشت و تاریخی ریسہ نا چیدہ مریک۔ پشتون کلچر ڈے ننے دا عزم انا پوسکنی نا وارخواہی فراوان کیک کہ نن تینا دودوربیدہ نا مثبت قدرآتے ورنا چین اسکان سرکینہ و اوفتے پوسکن آدور انا خواست آتتون ہم گرنچ کینہ۔ پشتون قوم انا تاریخ قدیم و شانی آ دودوربیدہ نا امین ءِ، وخت اس کہ پشتو زبان ڈیہہ انا اہم و بھلازبان تیٹی حساب مریک۔ پشتون راج اینو ہم تینا دلکش روایتی لویس، مزہ ئی آ کنشت‘ روایتی رقص، عدالتی نظام جرگہ، سخاوت، انسان دوستی و مہمانداری کون آ قابلِ قدر دودوربیدہ نا سوب آن اسہ جتاءُ دودوربیدہ ئی شناخت اس تخک۔ پشتون دودوربیدہ نا زیبائی اونا اجتماعی مزاج، شرف و تین پہ تینی شرف اٹی ہم ڈکوک ءِ۔ شملہ پشتون راج اٹ وقار و پجارنا چیدہ ءِ تو شال ننا آبادی نا اسہ بھلو و اہم بشخ اسے نا نمائندگی ءِ کیک۔ ہنداسوب آن ننا دودوربیدہ ئی شونداری و راجی پیشرفت ہم ہمو وخت پورو مننگ کیک ہراتم راج انا نرینہ و نیاڑیک بریبر شرف، وارخواہی و زمواری ون مونی بریر۔ شملہ و شال، ہڑتوم آ ک اواری اٹ اسہ بریبری و شونداری کروک راج اسے نا تغ ءِ پورو کیرہ۔ او پارے کہ پشتون کلچر ڈے بیرہ تینا دودوربیدہ ءِ یات کننگ نا دے اف بلکن قول ءِ پوسکنی نا دے ہم ارے۔ ننے قول کروئی ءِ کہ نن تینا زبان، ادب، تاریخ و دودوربیدہ ئی میرات نا رکھ اتون اوار اوار تعلیم، سائنس، ٹیکنالوجی، پٹ وپول و پوسکن علم نا پڑ اٹ ہم مون آ کانہ۔ ننا ورنا چین تینا شناخت آ گمر کرسا دنیا نا پوسکن آ خواست آتتون مون تننگ نا بود ودی کے، ہندا ننا حقی سرسہبی مریک۔