دہشت گرد آتے خلنگ سیکورٹی فورس آتا سرسہبی ءِ،وزیراعلیٰ بلوچستان

کوئٹہ، وزیراعلیٰ بلوچستان میر سرفراز بگٹی مستونگ نا علاقہ کانک دامان اٹ دہشت گرد آتا برخلاف سیکورٹی فورس آتا سرسہب کارروائی ناستاءِ کرسا پارینے کہ کارروائی ٹی 9 دہشت گرد ءِ خلنگ سیکورٹی فورس آتا کسبی لائخی و حکمتِ عملی نا شاہدی ءِ۔ وزیراعلیٰ میر سرفراز بگٹی پارے کہ سیکورٹی فورس آک دہشت گرد آتا لغوری کارروائی ءِ وخت آ و بھرمی وڑ اٹ بے سہب کریر۔ خلنگوک دہشتگرد آتیان سلہہ، منچر و 3 موٹرسائیکل دوئی کننگ ہم کارروائی نا اہم ءُ سرسہبی اسے۔ او دہشت گرد آتا برخلاف کارروائی ٹی ٹھپی مروک آ سیکورٹی فورس آتا ورنا نا دراخ جوڑی کن دعا کرسا پارے کہ دہشت گردی نا برخلاف جنگ اٹی سیکورٹی فورس آتا ورناتا قربانیک قوم اکن گمر نا سوب ءُ۔ وزیراعلیٰ پارے کہ بلوچستان اٹی دہشت گردی نا پورو چٹفنگ اسکان سیکورٹی فورس آتتون اوار سلوک اُن۔ دہشت گرد آک بلوچستان نا امن ءِ نسخان رسیفنگ اٹی ہچ گہس سرسہب مفسہ۔ میر سرفراز بگٹی پارے کہ ردالفتنہ 3 نا رد اٹ دہشت گرد آتا برخلاف کارروائیک گڈیکو دہشت گرد نا چٹفنگ اسکان برجا سلرہ۔ بلوچستان نا الس نا جان و مال انا رکھ و مدامگی امن کن ریاستی ادارہ غاک پورو واک و ارادگی اٹ کاریم کننگ ءُ۔ او پارے کہ حکومت، سیکورٹی فورس و الس نا تین ہ تینی کمک اٹ دہشت گردی ءِ چٹفنگک و بلوچستان اٹی امن و سوگوی کن کوشست آتے برجا تخنگک۔