بی ٹیوٹا ایم ڈی عبدالکبیر خان زرکون نا جرمنی نا سفیر وڈل اتون اوڑدہی

کوئٹہ، بلوچستان ٹیکنیکل ایجوکیشن اینڈ ووکیشنل ٹریننگ اتھارٹی (BTEVTA) نا مینیجنگ ڈائریکٹر عبدالکبیر خان زرکون پاکستان اٹی جرمنی نا سفیر Ina Lepel، ہیڈ آف جرمن ڈیولپمنٹ کوآپریشن و کونسلر ڈاکٹر میرجام و جرمنی نا اعزازی کونسل جنرل میر مراد تون اوڑدہی کرے، دا اوڑدہی نا بنداوی مسخت صوبہ نا تکنیکی و فنی تعلیم و ہیلکاری (TVET) سیکٹر ءِ جہانی آب انا وڑ اٹ جوڑ کننگ، فنی ہیلکاری و تکنیکی تعلیم نا آب ءِ گچین جوڑ کننگ و بلوچستان نا ہنرمند ورناتیکن جہانیکہول آ، خاص وڑ اٹ جرمنی ٹی، روزگار نا وارخواہی تا ودی کننگ ئس۔ اوڑدہی نا وخت آ ایم ڈی بی ٹیوٹا عبدالکبیر خان زرکون فنی و تکنیکی ہیلکاری نا بشخ اٹی جرمن حکومت نا کمک و GIZ کون انگا شون ہلوک ادارہ غاتا تاریخی کڑد آ منتواری نا درشانی ءِ کرے۔ او پارے کہ نصاب ءِ پوسکنوڑ جوڑ کننگ، ادارہ ئی بنداوی پنجر ءِ سوگو کننگ و ڈوئل ووکیشنل ٹریننگ سسٹم ءِ درستی راستی کرفنگ اٹی جرمنی نا پدریسہ کمکاری صوبہ ٹی ہزار آ ورناتے مدامگی فنی چاہنداری تون اوار واکدار جوڑ کننگ اٹی اہم کڑد ادا کرینے، دا وخت آ جرمن سفیر صوبہ ٹی کسبی تعلیم و ہیلکاری نا شون تننگ وپوسکن وڑ ٹیکنالوجی تے اوار کننگ آ جم گپ وتران کرے۔ او بی ٹیوٹا ءِ فنی چاہنداری تا شون و بلوچستان نا ورناتے واکدار جوڑ کننگ کن جرمنی نا پدریسہ کمکاری و ارادگی نا دوارگی کرے۔ ایم ڈی بی ٹیوٹا عبدالکبیر خان زرکون جرمن سفیر و اونا ڈَل ءِ بلوچستان نا بھلا زرگزرانی لائخی و اہم تکنیکی بشخ آتا بابت بریفنگ تس ہراڑے خصوصی ہنر نا بھاز گرج ءِ‘ او ریکوڈک و سیندک کون آ میگا پروجیکٹ آتا رد اٹ پوسکنوڑ مائننگ و منرل پروسیسنگ ٹیکنالوجیز، گوادر پورٹ تون تعلقدار میرین انجینئرنگ و بلیو ایکانومی، شمسی و بادی توانائی (سولر اینڈ ونڈ انرجی) نا سسٹمز، پوسکنوڑ کشت وکشار و و تحفظ آب انا تکنیک، و ڈیجیٹل آئی ٹی اسکلز آ بی ٹیوٹا نا چکار ءِ پیدوار کرے۔ داکان بیدس بیدس بی ٹیوٹا نا ماسٹر ٹرینرز و انسٹرکٹر آتا لائخی تے ٹی ودکی نا پروگرام و سند دوئی کروک ہنرمند ورناتے جرمن انڈسٹریل مارکیٹ اٹی دراست ملازمت نا وارخواہی فراوان کننگ کن باقاعدہ فریم ورک جوڑ کننگ آ ہم گپ وتران مس۔ دا اہم دیوان اٹی ڈائریکٹر بی ٹیوٹا غلام مصطفیٰ رئیسانی و اسسٹنٹ ڈائریکٹر تیمور ظفر ہم بشخ ہلک و کسبی تعلیم ءِ پین سوگو کننگ و صوبائی ہیلکاری پروگرام آتے جہانی صنعتی آب انا رِد اٹ جوڑ کننگ کن فائدہ تروک سلاہ تننگا۔