جھیڑہ و ایندھن نا فراوانی ٹی اڑاند آتا سوب جہانی چکار توانائی نا رکھ آ مسنے،سینیٹر محمد اورنگزیب

نیویارک، بنجائی وزیر خزانہ و بنگکاری سینیٹر محمد اورنگزیب پارینے کہ جغرافیائی و سیاسی جھیڑہ و ایندھن نا فراوانی ٹی اڑاند آتاسوب آن جہانی چکار توانائی نا گدریفنگ آن ودسا توانائی نا رکھ انا دمدستی چیلنج نا کنڈ آ مسنے، دوائی تا وس انا کچ نہاد، واپاری مدامگی و فراوانی نا ریسہ نا نیام اٹ بریبری نا گرج ءِ، لاس اینڈ ڈیمیج فنڈ ءِ فعال جوڑ کننگ اٹ سست پیشرفت گڑتی نا سوب ءِ۔ او دا ہیت ءِ اقوام متحدہ نا جنرل اسمبلی نا 81 می سالانہ دیوان نا وخت آ چندی شخصیت آتتون اوڑدہی و گپ وتران نا وخت آ کرے۔ وزیر خزانہ توانائی نا رکھ، ایوی ایشن نا بشخ اٹ کمکاری، جان جوڑی نا پروگرام آ عملدرآمد و موسمیاتی مالیات نا بابت جہانی شریدار آتتون بڑزکو کہول انا اوڑدہی و اہم باندات آ گپ وتران کرے۔ وزیر خزانہ جہانی اقتصادی فورم نا کنڈ آن ”پوسکن آ زرگزران اٹ شونداری کن توانائی فراوان کننگ ” نا سرحال آ بڑزکو کہولی گپ وتران اٹ بشخ ہلک۔ او پارے کہ برجا جغرافیائی سیاسی جھیڑہ و ایندھن نا فراوانی ٹی اڑاند آتا سوب آن جہانی چکار توانائی نا گدریفنگ آن ودسا توانائی نا رکھ انا دمدستی چیلنج نا کنڈ آ مسنے۔ او پارے کہ پاکستان اٹ شمسی توانائی نا بشخ اٹ نمان ودکی مسنے ہراٹی بھلو حداسسکان پرائیویٹ بشخ کڑد ادا کرے، دا درآمدی ایندھن آ سیبو ءِ کم کننگ کن قابلِ تجدید توانائی نا لائخی ءِ درشان کیک۔ وزیر خزانہ زور شاغا کہ توانائی نا فراوانی نا دوئی کننگ اٹ مشکل آتا گیشتر زرگزرانی زہم تمک‘ انتئے کہ توانائی نا رکھ غذائی رکھ و جم زرگزرانی سوگوی تون بھلوتعلقداری اس تخک۔ او بوئنگ گلوبل نا صدر ڈاکٹر برینڈن نیلسن تون ہم اوڑدہی کرے ہراٹی پی آئی اے نا فضائی بیڑہ نا پوسکنوڑی و پاکستان نا ایوی ایشن نا بشخ اٹ گیشتر کمکاری آ گپ وتران مس۔ سینیٹر محمد اورنگزیب بوئنگ نا کنڈ آن پی آئی اے ءِ پوسکن آ جہاز آتا ہلنگ کن اولسرجاچ سلاہ پیش کننگ نا پک کننگ نا ستاءِ کرے، جہاز آتا زوت رسینگ گیگ نا گمانی ممکنہ وارخواہی و عبوری وڑ اٹ جہاز لیز آ ہلنگ نا بست وبند آتا ہم جاچ ءِ ہلنگا۔ اوڑدہی ٹی امریکی ایکسپورٹ امپورٹ بینک انا کنڈ آن مالی کمک، انجن آتا ہلنگ، اسپیئر پارٹس، خیالداری و گراؤنڈ کروک جہاز آتا بحالی نا بابت باندات آ ہم گپ وتران مس۔ وزیر خزانہ پی آئی اے نا پرائیویٹائزیشن و بھلاہوائی اڈہ غاتا انتظام ءِ آؤٹ سورس کننگ نا ڈٹ آتا بابت معلومدار کرے۔