18 جون نا مفاہمتی یادداشت آ عمل مونی ہننگ نا اسٹ انگا کسر ءِ،نائب وزیراعظم اسحاق ڈار

اسلام آباد/ پاناما سٹی، امریکی ناظم الامور نٹالی اے بیکر نائب وزیراعظم و وزیر خارجہ محمد اسحاق ڈار تون اوڑدہی کرے، ہراٹی پاکستان امریکہ ہڑتوم آ کنڈآن کمکاری و پوسکن آ علاقائی حالیت آتیا گپ وتران کننگا۔ ترجمان دفتر خارجہ نا رداٹ اوڑدہی نا وخت آ نائب وزیراعظم اسحاق ڈار پاکستان امریکہ تعلقداری تیٹی مروک آ مثبت پیش رفت ءِ است جمی نا سوب گوندا وپارے کہ مدامگی امن کن مذاکرات و سفارت کاری المی ءِ‘ اسحاق ڈار پارے کہ 18 جون نا اسلام آباد مفاہمتی یادداشت آ پورو آن پورو عملدرآمد مونی ہننگ نا اسٹ انگا کسر ءِ۔ پاکستان تینا قومی فائدہ غاتا رکھ اتون اوار اوار علاقائی امن و سلامتی کن ہم پُرعزم ءِ۔ امریکی ناظم الامور نٹالی بیکر علاقائی امن و سوگوی کن پاکستان نا گچین کڑد اناستاءِ کرے۔ اوڑدہی نا وخت آ نٹالی بیکر نائب وزیراعظم اسحاق ڈار ءِ پاکستان نا یومِ آزادی آ مبارکبادی ہم تس۔ ایلو کنڈ آ ایران و امریکہ نا نیام اٹی برجا چک وتاڑ ناسوب آن آبنائے ہرمز اٹی واپاری سرجز آک سلیسنو۔ پین اِرا بحری جہاز آتیا جلہو آن پد امریکہ ایران نا برخلاف بحری ناکہ بندی ءِ برجا تخنگ و بروک آ ہفتہ پین سخت زرگزرانی گام گیج آتا اشارہ تسنے، ہراڑان جہانی توانائی و واپاری نا بشخ آتیٹی گڑتی ودانے۔ برطانوی خبر رساں ادارہ نا رداٹ ریاستی ملکیت اولا ابوظہبی نیشنل آئل کمپنی نا اِرا بحری جہاز آبنائے ہرمز آن گدریفنگ نا وخت آ جلہو آتے شست کننگا۔ متحدہ عرب امارات جلہو آتا دوبہ ءِ ایران آ خلک، ولے تہران نا کنڈ آن دمدستی وڑاٹ ہچ ءُ ورندی اس مون آ بتنے۔ بحری جہاز آتا چاروکی کروک آ کمپنی کپلر نا رداٹ پنچ شنبے نا دے خلیج نا پترینگوک آ کسر آ ساڑی دا اہم انگا دیرا نا کسر آن بیرہ 9 بحری جہاز گدرینگار، وخت اس کہ چارشنبے آ دا کچ 5 ئس۔ اگست اٹی ہڑدے 12 نا کچ جہاز دا ہند آن گدرینگسا کرینو۔ جمعہ نا سہب اسکان ٹریکنگ ڈیٹا ٹی ہچ ءُ بحری جہاز اسے نا نمان ہن و بر خننگتو۔ امریکی وزیر دفاع پیٹ ہیگستھ پارے کہ امریکی بحریہ ڈیہہ اٹ تینا ساڑی گری ءِ برجا تخسا ایران نا بحری ناکہ بندی ءِ بے مُد وخت اسکان نافذ کننگ نا بود تخک۔ امریکی وزیر خزانہ اسکاٹ بیسنٹ پارے کہ واشنگٹن ایران ءِ پین مالی نسخان رسیفنگ نا تیاری کننگ اٹی ءِ۔ او اشارہ تس کہ بروک آ ہفتہ ایران نا برخلاف ہندن ءُ پین زرگزرانی گام گیج آتا پڑو کننگک ہرافتا درور مستین اٹی اف۔