بروک آ وار جنگ مس تو مہالو آن زیات و پبی کارروائی کینہ،سیاسی سلاہکار ایرانی سپریم لیڈر

تہران، ایران نا اسہ اہم ءُ کمامدار اسے پارینے کہ اگہ آخبت اٹی دوارہ جنگ مس تو ایران مہالو آن زیات سخت و پبی کارروائی کیک۔ ایرانی حوالکاری ادارہ فارس نیوز نا رداٹ سپریم لیڈر نا دفتر اٹی سیاسی سلاہکار بریگیڈیئر جنرل رسول ثنائی راد دا بیان ءِ تسنے۔ رسول ثنائی راد پارے کہ ایران دا وار نا جنگ انا وخت آ سوگو مزاحمت نشان تس و آخبت اٹ ہر وڑ انا گمانی جنگ اسے نا وخت آ داکان ہم زیات سوگو و پبی وڑ تینائی کننگک۔ او تینا بیان اٹی پارے کہ نن دا وار نا جنگ اٹ سوگو سلیسُن‘ و انشاء اللہ آخبت اٹی گمانی جنگ مس تو داکان ہم زیات سوگو و پبی وڑ اٹ مون ایتنہ۔ ایرانی عہدیدار تینا بیان اٹی امریکہ نا سدھا پن ءِ ہلتو، ولے او ایران نا “دشمن” آ دوبہ خلک کہ او زرگزرانی زور شاغنگ ناکمک اٹ ایرانی راج انا تہٹی چک وتاڑ و بشخ و پانٹ ودی کننگ نا کوشست کننگ اٹی ئس۔ رسول ثنائی راد نا رداٹ دشمن نا مسخت زرگزرانی خواری تے کاریم اٹ اتسا ایران نا تہٹی الس و ریاست نا نیام اٹی مُدی ودی کننگ و ملک اٹی جھیڑہ غاتے ودفنگ ئس، ولے او پارے کہ دا ڈٹ سرسہب مننگ کتو۔ ایرانی عہدیدار دا ہیت آ زور شاغا کہ دا وار نا جنگ انا وخت آ ایران مروک زوراکی آن پد ہم تینا مزاحمت ءِ برجا تخا۔ او پارے کہ آخبت اٹی ہر وڑ انا گمانی چک وتاڑ نا وخت آ ایران ماہلو آن زیات سخت ورندی تننگ کن سنبرینگوک مریک۔