چاغی، اِلار نا منڈی اسکان رسینگ گیگ مفننگ آن کشارگرک نسخانی

چاغی ٹی ہندی کہول آ الار نا منڈی مفننگ و کشارگر آتتون آسراتی تا مفننگ نا سوب آن ہندی زمیندار آتے نسخان مون تروئی تمنگ اٹی ءِ۔ حوال نا رِد اٹ چاغی، امین آباد و لشکراپ اٹی الار نا سیزن بنا مسنے ولے ہندی کہول آ الار مارکیٹ و کشارگر آتتون آسراتی مفننگ نا سوب آن ہر سال آنبار دا سال ہم الار مالک و مزورکار آک نسخان ہرفنگ اٹی ءُ۔ چاغی امین آباد اٹی حکومتی کہول آ الار مالک آتے ہچ ءُ وڑ انا آسراتی اس دوئی اف ہرانا سوب آن باغ مالک آک تینا الار تے ارزان اٹ بہا کننگ آ بیوس ءُ۔ زمیندارک مچ آ سال الار کن خواری کرسا دا فصل ءِ تیار کیرہ ولے دا خواری آن پد فصل مالک ءِ کٹیا رسینگپک و ہندی الس تون ہمو آسراتی اف کہ او تینٹ کراچی مارکیٹ اسکان رسینگ گیگ دوئی کننگ کیر ہندا سوب آن او ہر سال نسخان ہرفرہ۔ چاغی امین آباد و چاغی لشکراپ نا الار مالک آک وزیراعلیٰ بلوچستان میر سرفراز بگٹی و ایم پی اے چاغی حاجی صادق خان سنجرانی آن خواست کرینو کہ مارکیٹ اسکان رسینگ کن اوفتے آسراتی تا فراوانی ءِ پک کننگے۔ (نامہ نگار)