بدل مروک خواست آتا رد اٹ ٹیکنالوجی تون ہم گرنچ مننگ المی ءِ،کور کمانڈر بلوچستان

پنجگور، کور کمانڈر بلوچستان پنجگور نا دورہ ءِ کرے، ہراڑے او بلوچستان اسپیشل ڈویلپمنٹ انیشی ایٹو (BSDI) نا رِد اٹ جوڑ مروک جناح آئی ٹی ہب، مکران یونیورسٹی ٹی ایف سی بلوچستان (ساؤتھ) پرواز فاؤنڈیشن نا کنڈآن تفنگوک سرسہب احمد خان لاؤنج و زیبائی و بیرشت آن پد فعال مروک علامہ اقبال آڈیٹوریم نا باقاعدہ بناءِ کرے۔ جناح آئی ٹی ہب انا مسخت ورنا چین ءِ پوسکنوڑ ڈیجیٹل تعلیم، کسبی لائخی و ٹیکنالوجی تون ہم گرنچ کرسا واکدار کننگ ءِ۔ جناح آئی ٹی ہب اٹی 50 پوسکن کمپیوٹر آتیا تالان آئی ٹی ہال، ڈیجیٹل لائبریری، فری لانسرز ہب، تیز انگا انٹرنیٹ، ای کامرس و فری لانسنگ نا آسراتی تون اوار بجلی نا بے سلنگ فراوانی کن ہیوی سولر سسٹم بیک اپ ہم فراوان کننگانے۔ کور کمانڈر بلوچستان مکران یونیورسٹی ٹی سرسید احمد خان لاؤنج و علامہ اقبال آڈیٹوریم نا ہم بناءِ کرے۔ سرسید احمد خان لاؤنج اٹی مار ومسڑ طالب علم آتیکن جتا و آب اٹو تفریحی و کیفے ٹیریا نا آسراتی فراوان کننگانو، وخت اس کہ ہموڑے مسیت اس ہم تفنگانے۔ یونیورسٹی ٹی 120 تولنگ نا ہند آتیا تالان علامہ اقبال آڈیٹوریم نا زیبائی و بیرشت کننگانے، ہراڑے پوسکن آ فرنیچر و ساؤنڈ سسٹم ہم فراوان کننگا۔ کور کمانڈر بلوچستان ورنا چین ءِ پوسکنوڑ تعلیم و ڈیجیٹل اسکلز نا دوئی کننگ آ زور شاغسا پارے کہ بدل مروک دور انا خواست آتا رِد اٹ پوسکن آ ٹیکنالوجی تون ہم گرنچ مننگ المی ءِ۔ او پارے کہ سیکورٹی اسہ جم ءُ زمواری اسے، سیکورٹی فورس آتا مسخت علاقہ ٹی مدامگی امن، السی است خواہی تا رِد اٹ شونداری ڈٹ آتیا عملدرآمد و گچین السی خذمت آتا فراوانی ءِ پک کننگ ءِ۔ کور کمانڈر مکران یونیورسٹی و ویمن اسکل ڈویلپمنٹ سینٹر پنجگور نا جتا جتا بشخ آتیٹی نمان کارکڑد نشان تروک طالب علم آتے ٹی لیپ ٹاپ ہم بشخ و پانٹ کرے۔ (نامہ نگار)