پاکستان کل چیلنج آتیان پد ہم امن کن سفارتی کوشست آتے برجا تخک،ترجمان دفتر خارجہ

اسلام آباد، دفتر خارجہ پارینے کہ پاکستان ڈیہہ و دنیا ٹی امن و سلامتی نا شون اکن کل چیلنج آتیان پد ہم تینا سفارتی کوشست آتے برجا تخانے۔ مکہ معاہدہ بنداوی وڑ اٹ دفاعی وڑ اناسے ہرانا مسخت امن و سلامتی نا شون تننگ ءِ‘ باب المندب اٹی واپاری جہاز آ حوثی جلہو ارمان نا ہیت اسے‘ پاکستان واپاری جہاز آ جلہو نا مذمت ءِ کیک۔ ہفتہ وار پریس بریفنگ نا وخت آ ترجمان دفتر خارجہ طاہر حسین اندرابی پارے کہ پاکستان ڈیہہ و دنیا ٹی امن و سلامتی نا شون تننگ کن تینا سفارتی کوشست آتے برجا تخانے۔ اسلام آباد مفاہمتی یادداشت نا رداٹ فریق آتے مذاکرات نا میز آ اتنگ کن کوشست اٹی ءِ۔ نائب وزیراعظم و وزیر خارجہ اسحاق ڈار اسہ دے اٹی سعودی عرب، ایران و کویت نا وزیر خارجہ غاتتون ٹیل فون آ حوال کرے، وخت اس کہ 11 اگست آ بحرین نا وزیر خارجہ تون ہم ہیت و گپ مس۔ ترجمان نا رداٹ بحرین نا وزیر خارجہ نائب وزیراعظم ءِ مکہ معاہدہ غا مبارکبادی تس۔ داکان مست 9 اگست آ نائب وزیراعظم نا کینیڈا و سینیگال نا وزیر خارجہ تتون ہم ٹیل فون آ گپ و تران مس۔ ترجمان پارے کہ بنجائی وزیر داخلہ ایران نا دورہ غاٹے ہراڑے ایرانی سرکڑدہ غاتتون امن و ہڑتوم آ کنڈانا تعلقداری تیا گپ و تران مس۔ ترجمان دفتر خارجہ باب المندب اٹی واپاری جہاز آ حوثی جلہو ءِ است ہسونی ناسوب گوندسا پارے کہ پاکستان واپاری جہاز آ جلہو نا مذمت ءِ کیک۔ واقعہ ٹی 3 پاکستانی شہید مسر ہرافتا میت آتے پاکستان آ اتنگ نا کوشست برجا ءِ۔ پاکستان سمندری واپاری جہاز آتا آجو ہن و بر آ پت تخک و واقعہ نا سرجم حوال آتیٹی سعودی کمامدار و جہانی کہول آ امنا کروک یمنی حکومت تون رابطہ ٹی ءِ۔ طاہر حسین اندرابی پارے کہ بھارت آزاد کشمیر نا حالیت آن سیاسی فائدہ ہرفنگ نا کوشست کننگ اٹی ءِ‘ بھارت ءِ آزاد کشمیر آ تبصرہ نا جاگہ غا مقبوضہ کشمیر نا حالیت آ چکار کروئی مریک‘ و کشمیری تے حقِ خودارادیت تننگے۔ آئی ایم ایف پروگرام نا بابت ترجمان پارے کہ پاکستان پروگرام اٹی ءِ و سرسہبی اٹ 3 جاچ پوروی اسکان سرکرینے‘ جلہو آن بحیرہ احمر اٹی واپاری جہاز رانی کن خلیس آتیٹی پین ودکی مسنے۔ پاکستان سعودی کماشی ٹی بحری سلامتی نا بابت جوڑ مروک سیوت نا بشخ اسے وجہانی دیر تیٹی رکھی جہاز رانی ءِ پک کننگ کن تینا زمواری تے سر تننگ کن تیار ءِ۔ ترجمان دفتر خارجہ مکہ معاہدہ نا بابت پارے کہ معاہدہ پیدوار ءِ و بنداوی وڑ اٹ دفاعی وڑ اناسے ہرانا نا مسخت امن و سلامتی نا شون تننگ ءِ‘ مکہ معاہدہ بیرہ مسہ ملک اسکان کچ اٹ بلکن ڈیہہ و اونا پیشن اسیجائی سلامتی ءِ پک کننگ کن کوشست آک برجا تخنگ مریرہ۔ ترجمان نا رداٹ مکہ معاہدہ نا رداٹ اسہ ملک اسے آ جلہو کل آ جلہو تکنگک۔