چاغی نا سرکاری ہسپتال اٹی میڈیکل ڈاکٹر نا کاختی، الس درمان کن فریشان

چاغی، چاغی شار انا اسٹ انگا سرکاری ہسپتال اٹی میڈیکل ڈاکٹر اف، چاغی نا الس ءِ درمان و جانجوڑی ٹی سخت خواری مون تروئی تمنگ اٹی ءِ۔ آر ایچ سی ہسپتال اٹی دارو نا کوٹہ علاقہ نا الس نا کچ اٹ بھاز کم ءِ‘ کمامدار آک نوٹس ہلیر۔ سرجم حوال آتا رِد اٹ آر ایچ سی ہسپتال چاغی ٹی 5 سال آن میڈیکل ڈاکٹر تعینات اف۔ آر ایچ سی ہسپتال چاغی ءِ داروک متکن آ آبادی نا کچ اٹ ملنگ اٹی ءُ ہراکہ چاغی شار اکن اسُل بھاز کم ءُ۔ تحصیل چاغی نا اسٹ انگا سرکاری ہسپتال میڈیکل ڈاکٹر آن محروم ءِ‘ شاری زکام و ال نا درمان کن ہم 65 کلومیٹر مُر دالبندین آ ہننگ آ بیوس ءُ۔ ایم بی بی ایس ڈاکٹر نا مفننگ نا سوب آن (ایمرجنسی حالیت آتیٹی چاغی نا الس بھاز فریشان مریک‘ چاغی نا السی تپہ غاک وزیراعلیٰ بلوچستان میر سرفراز بگٹی، ایم پی اے چاغی حاجی صادق خان سنجرانی، چیف سیکرٹری بلوچستان و ڈی جی ہیلتھ آن خواست کرینو کہ چاغی ٹی میڈیکل آفیسر تعینات کننگے و آر ایچ سی ہسپتال نا دارو نا کوٹہ ءِ ودفنگے تانکہ چاغی نا الس ءِ جانجوڑی نا ویل و خواری تیان نجات رسینگے۔