وزیر اعلیٰ بلوچستان نا خصوصی پارت،جشن آزادی نا رد اٹ مچ آ صوبہ ٹی چندی دود، گوازی تا گو جم و جوش اٹ اڈ تننگ انگ ءِ

کوئٹہ، وزیراعلیٰ بلوچستان میر سرفراز بگٹی نا خصوصی پارت آ جشنِ آزادی نا رد اٹ مچ آ صوبہ ٹی جتا جتا دود و گوازی تا مقابلہ گوتا بست و بند پبی جوش و جوزہ اٹ برجا ءِ‘دا رد اٹ صوبائی دارالحکومت کوئٹہ ٹی محکمہ گوازی و ورنا باندات بلوچستان نا کنڈ آن “Run for Fun” نا سرحال آ میراتھن ریس اڈ تننگا ہراٹی 100 آن زیات ورنا ایتھلیٹس بشخ ہلکر۔ میراتھن ریس ایئرپورٹ روڈ آن بنا مس و ایوب اسپورٹس کمپلیکس اٹی ایسر مس، ہراڑے ورنا ایتھلیٹس آک جوش و جوزہ نا درشانی ءِ کریر وخت اس کہ شاری و گوازی تتون تعلقدار تپہ غاک دا دراخ جوڑ سرجز نا ستاءِ کریر۔ گو اٹ ورنا ایتھلیٹ عین اللہ اولیکو، رحیم ارٹمیکو وخت اس کہ محمد اکرم مسٹمیکو پوزیشن دوئی کرے، نمان پوزیشن دوئی کروک ایتھلیٹس آتیٹی میڈل و نغد انعام ہم بشخ و پانٹ کننگا۔ دا وخت آ سیکرٹری گوازی و ورنا باندات بلوچستان درا بلوچ و ڈائریکٹر جنرل گوازی ڈاکٹر یاسر بازی تون اوار محکمہ گوازی نا افسر، ایتھلیٹس و شاری تا بھلو کچ اس ساڑی ئس۔ سیکرٹری گوازی درا بلوچ دا وخت آ ہیت وگپ کرسا پارے کہ جشنِ آزادی نا رد اٹ مچ آ صوبہ ٹی گوازی تتون اوار جتا جتا سرجز آتیا تالان پروگرام اڈ تننگ انگ ءِ‘ کوئٹہ ٹی ایوب اسپورٹس کمپلیکس و شار نا ایلو ہند آتیا کساس 40 جتا جتا گوازی تا گو اڈ تننگ انگ ءُ۔ او پارے کہ “Run for Fun” میراتھن ریس انا مسخت ورنا و شاری تے دراخ جوڑو مثبت سرجز آتا کنڈ آ اتنگ ءِ‘ انتئے کہ گوازی نئے بیرہ جانی جانجوڑی کن المی ءِ بلکن ورنا تیٹی نظم و ضبط، سگ، مثبت سوچ و گچین رویہ غاتے شون تننگ اٹی ہم اہم کڑد ادا کیک۔او پارے کہ وزیراعلیٰ بلوچستان میر سرفراز بگٹی نا پارت آ محکمہ گوازی نا کنڈ آن مچ آ صوبہ ٹی میگا اسپورٹس فیسٹیول نا بنا کننگانے، ہرا نا رِد اٹ ضلعی ہیڈ کوارٹرز نا کہول آ 10 گیمز، ڈویژنل کہول آ 12 گیمز وخت اس کہ صوبائی دارالحکومت کوئٹہ ٹی 40 جتا جتا گوازی تیا تالان پروگرام آک اڈ تننگ انگ ءُ۔ سیکرٹری گوازی مستی پارے کہ گوازی تا دا سرجز آک جشنِ آزادی 14 اگست آن پد ہم برجا سلرہ تانکہ زیات آن زیات ورناتے دراخ جوڑ سرجز آتے ٹی بشخ ہلنگ نا وارخواہی رسینگے و صوبہ نا لائخ آ ورنا ایتھلیٹس آتے تینا لائخی تا درشانی کن پلیٹ فارم دوئی مرے۔