قلعہ سیف اللہ ٹی مکہ دفاعی معاہدہ نا رد اٹ پینا فلیکس خلنگا

قلعہ سیف اللہ، ڈپٹی کمشنر قلعہ سیف اللہ ساگر کمار نا پارت آ پاکستان، سعودی عرب و ترکیہ نا نیام اٹی مروک تاریخی اسیجائی دفاعی معاہدہ نا ستا کننگ کن مچ آ ضلع نا اہم آ ہند آتیا پینا فلیکس خلنگا۔ پینا فلیکس نا کمک اٹ پاکستان، سعودی عرب و ترکیہ نا نیام اٹی متکن آ ایلمی تعلقداری، تین پہ تینی پت و دفاعی کمکاری ءِ پاش کننگانے۔دا گام انا مسخت مسہ ایلم ملک آتا نیام اٹی سوگو تعلقداری و تاریخی دفاعی شریداری نا بابت السی جوزہ غاتا درشانی ءِ کننگ ءِ۔ ڈپٹی کمشنر ساگر کمار پارے کہ پاکستان، سعودی عرب و ترکیہ نا نیام اٹی اسیجائی دفاعی معاہدہ ڈیہہ اٹی امن، سلامتی و سوگوی کن اسہ اہم ءُ پیش رفت اسے۔ ہرمسٹ آ ملک آتا نیام اٹی تین ہ تینی کمکاری و دفاعی شریداری پین سوگو مننگ آن ایلمی تعلقداری تے پوسکن ءُ دروشم اس رسینگک‘ او پارے کہ سعودی عرب و ترکیہ پاکستان نا ایلم اسلامی ملک ءُ و پاکستانی الس ہڑتوم آ ملک آتتون مہر و عقیدت تخک۔ مکہ مکرمہ ٹی پک مروک دا تاریخی معاہدہ ہرمسٹ آ ملک آتا نیام اٹی سیوت، اخوت و اسیجائی سلامتی نا عزم انا درشانی ءِ۔