اوغان طالبان تا کنڈ آن دعویٰ جہانی چکار اینک کننگ نا کوشست اسے،حوالکاری و شینکاری وزارت

اسلام آباد، وزارت حوالکاری و شینکاری نا کنڈ آن اوغان طالبان نا دعویٰ ءِ مسترد کرسا پاکستان آن اوغانستان اٹی سلہہ غاتا پاننگوک اسمگلنگ نا اوغان طالبان تا دعویٰ ءِ بے بنداو و راستکی تیان چَپ گوندنگانے۔ پاکستان نا وزارتِ حوالکاری نا کنڈ آن جاری مروک بیان اٹی پاننگانے کہ دا دعویٰ امنا کروک راستکی تیان چَپ ءِ و جہانی چکار ءِ اصل ویل آن اینک کننگ نا کوشست اسے۔ وزارتِ حوالکاری نا رِد اٹ اوغانستان اٹ امریکی و سیوتی فوج آتا پیش تمنگ آن پد اِلنگوک آ پوسکن آ سلہہ و فوجی گڑاتا بھلو کچ اس مہالو آن بھاز ءُ‘ دا اِلنگوک آ گڑاتا مالیت نا کساس 7.2 ارب امریکی ڈالر تکنگانے۔وزارتِ حوالکاری نا رِد اٹ اوغانستان اٹی کیہی دہائی تا جھیڑہ غاتیان مچ مروک آ سوویت دور انا سلہہ غاتا بھلا کوڑی اس ہم ساڑی ءِ‘ دا کوڑیک ہم اوغان ڈغار آ سلہہ غاتا ساڑی گری نا اسہ اہم ءُ سوب اسے ءُ، دا وڑ انا سلہہ غاتے پاکستان تون گنڈنگ نا کوشست جہانی چکار ءِ اصل و زیات بھلا ویل آتیان اینک کننگ نا اسہ کوشست اسے۔ پاکستان وزارتِ حوالکاری و شینکاری نا رِد اٹ دا باندات اوغان ڈغار آ دہشت گرد ٹولی تا ساڑی گری و سرجز آتا بابت اہم گڑتی تے ڈکنگ آنبار ءِ۔ اوغان ڈغار آ دہشت گرد ٹولی تے داسہ ہم ہنکین‘ کمکاری و کارروائی نا آجوئی دوئی ءِ‘ دا ٹولیک اوغان ڈغار آن پاکستان اٹی دہشت گرد جلہو آتا ڈٹ بندی، کمک و کارروائی کننگ ءُ، اوغان طالبان تے بے بنداو دوبہ غاتا جاگہ غا تینا ڈغار آ ساڑی دہشت گرد آتا رکھی ہنکین آتا برخلاف کارروائی کروئی مریک۔ اوغان کمامدار آک تینا وعدہ غاتیا عمل کیر و اوغان ڈغار ءِ پاکستان یا پین ملک اسے نا برخلاف دہشت گردی کن کاریم اٹ اتنگ کن الیپس۔