امریکہ تہران تون مذاکرات آ بیوس مسنے، ایرانی صدر

تہران، ایران نا صدر مسعود پزشکیان پارینے کہ امریکہ تہران تون مذاکرات و ہیت وگپ کننگ آ بیوس مسنے‘ ہرا ننا سفارت کاری نا سرسہبی ءِ و ہندا ہمو وخت ءِ ہراتم اسہ معاہدہ اسے اسکان سر مننگ کینہ۔ ایران نا دارالحکومت تہران اٹی میڈیا نا نمائندہ غاتتون ہیت کرسا صدر مسعود پزشکیان پارے کہ امریکہ اسلام آباد مفاہمتی یادداشت و ایران و عمان نا کنڈ آن اسیجائی جوڑ کروک ٹک آتیا عمل کننگ نا پابند ئس ولے واشنگٹن دُن کتو ہندا سوب آن ننے تینا ورندی تروئی تما۔او پارے کہ دا حالیت آتتون مون تننگ کن خصوصی ٹیم اسے نا گرج مریک و ننا ٹیم دا تنکی آ تینا کاریم ءِ برجا تخانے، و نن اومیت کینہ کہ ایران تینا شرف، عزمو گمر نا آب اتون مونی گام ہرفک۔ ایرانی صدر پریس کانفرنس اٹی پیدوار لوز آتیٹی امریکہ ءِ ڈوہدار و استعماری حکومت گوندسا پارے کہ امریکہ نا برخلاف ننا پالیسی ٹی ہچ ءُ بدلی اس بتنے۔ او ایرانی قوم ءِ معلومدار کرسا پارے کہ امریکہ و اسرائیل نا سیوت جنگ انا کمک اٹ تہران ءِ نزور کننگ کتو ہندا سوب آن داسہ او تینا لغور آ مسخت آتا پوروی کن ایرانی قوم اٹی بشخ و پانٹ و جھیڑہ غاتے تالان کرسا اودے سلہہ نا وڑ اٹی کاریم اٹ اتنگ خوارہ ہراڑان ایرانی قوم ءِ بایدے سما مرے۔