پولیس ناامن و ایمنی و کانود نا بالادستی کن قربانیک بے کچ ءُ، سردار ایاز

قومی اسمبلی نا اسپیکر سردار ایاز صادق پولیس نا شہید آتا دے انا وخت آ شہید آتے خراجِ عقیدت پیش کرسا پارینے کہ پولیس نا افسر و ورناک ملک آن دہشت گردی نا چٹفنگ، امن و ایمنی و کانود نا بالادستی کن بے کچ قربانی تسنو۔ دا خیال آتا درشانی ءِ او سے شنبے نا دے آپولیس نا شہید آتا دے انا وخت آ تینا کلہو اٹ کرے۔ او پارے کہ مچ آ قوم پولیس نا شہید آتا جیرت، بہادری و فرض شناسی ءِ سلام پیش کیک، امن و ایمنی و کانود نا حکمرانی کن سیکورٹی فورس و کانود نافذ کروک ادارہ غاتا قربانی تے اسُل گیرام کننگ مفک۔ اسپیکر پارے کہ شہید آتا قربانیک قوم انا گمر ءُ، پولیس فورس انا قربانی تے مدام یات تخنگک، پولیس فورس دہشت گردی نا برخلاف جنگ اٹ اولیکو دستہ نا کڑد ادا کننگ ءِ۔ او پارے کہ شہید آتا خاہوت آتا صبر و استقامت و حوصلہ ءِ سلام پیش کیوہ۔ اسپیکر اللہ تعالیٰ غان شہید آتا درجہ غاتا بڑزی کن دعا ہم کرے۔