پولیس نا شہید آتا قربانیک مچ آ قوم اکن گمر نا سوب ءُ، بنجائی وزیر ریلوائی
Get real time updates directly on you device, subscribe now.
بنجائی وزیر ریلوائی محمد حنیف عباسی ”یومِ شہدائے پولیس“ نا وخت آ قوم انا بہادر گلزادہ غاتے خراجِ عقیدت پیش کرسا پارینے کہ وطنِ عزیز نا رکھ و امن و ایمنی کن پولیس فورس انا قربانیک گیرام مفروک و مچ آ قوم اکن گمر نا سوب ءُ۔ تینا اسہ کلہو اسے ٹی بنجائی وزیر پارے کہ دہشت گردی و ڈوہ تا چٹفنگ کن پولیس فورس ہرا کسبی چاہنداری و بہادری نا درشانی ءِ کرینے، او ستاکڑزک۔ خیبر پختونخوا و بلوچستان تون اوار مچ آ ملک انا پولیس کارندہ غاک امن کن تینا جان تے ندر کرینو، ہرافتا عزم و جوزہ ءِ مچ آ قوم سلام پیش کیک۔ محمد حنیف عباسی شہید آتا پدخاہوت آتتون یکجہتی نا درشانی کرسا پارے کہ پولیس شہید آتا پدخاہوت آتا قربانیک مچ آ قوم انا اسیجائی میرات ءُ و حکومت اوفتتون ہم کوپہ سلوک ءِ۔ یومِ شہدائے پولیس ننے تینا ہمو محافظ آتا عظیم خذمت آتا امنائی و اوفتا یات آتے تازہ تخنگ نا کلہو ایتک۔ او زور شاغا کہ ملک اٹ مدامگی امن، کانود نا بے فرق عملداری و رکھ انا فراوانی کن اسہ سوگو، پوسکن و باصلاحیت پولیس فورس انا جوڑ کننگ المی ءِ۔