زرگزرانی شونداری کن پرائیویٹ زرکاری ءِ شون تروئی تمک،وزیراعظم محمد شہباز شریف
ملک اٹی پبلک ایکویٹی مارکیٹ و پرائیویٹ ایکویٹی فنڈ انا شون تننگ کن جامع روڈ میپ اس جوڑ کننگے
Get real time updates directly on you device, subscribe now.
وزیراعظم محمد شہباز شریف پارینے کہ ملک انا زرگزرانی شونداری کن پرائیویٹ زرکاری نا شون تننگ المی ءِ و پارت کرے کہ ملک اٹی پبلک ایکویٹی مارکیٹ و پرائیویٹ ایکویٹی فنڈ انا شون اکن جامع روڈ میپ جوڑ کرسا زوت پیش کننگے۔ وزیراعظم محمد شہباز شریف نا کماشی ٹی پرائیویٹ زرکاری نا شون و مدامگی زرگزرانی شونداری نا بابت دیوان اڈ ہلک۔ وزیراعظم ملک اٹی زرکاری و چنکا و نیامی کچ انا کاروباری شون اکن پرائیویٹ ایکویٹی فنڈ انا تفنگ نا بابت سج پام زوت آن زوت پیش کننگ نا پارت کرے و پارے کہ ملک اٹی پبلک ایکویٹی مارکیٹ و پرائیویٹ ایکویٹی فنڈ انا شون اکن جامع روڈ میپ جوڑ کرسا زوت پیش کننگے، تانکہ ملک اٹی زرکاری کن فنڈ ساڑی مرے و درملکی زرکاری کن کسر ملنگے۔ ملک انا زرگزرانی شونداری کن پرائیویٹ زرکاری نا شون المی ءِ‘پرائیویٹ ایکویٹی فنڈ زرگزران اٹی زرکاری‘ کاروباری ودکی و روزگار نا وارخواہی ودی کننگ کن اسہ بھرمی محرک نا کڑد ادا کننگ کیک۔ وزیراعظم پارے کہ معدنیات، کشت وکشار‘ لائیو اسٹاک، توانائی، انفارمیشن ٹیکنالوجی (آئی ٹی) و ایلو بشخ آک پاکستان نا زرگزران نا شونداری نا بنداوی محرک جوڑ مننگ نا بود تخرہ‘ دا بشخ آتیٹی زرکاری کن پبلک ایکویٹی مارکیٹ اسہ اہم ءُ وسیلہ اس جوڑ مننگ کیک، بینکنگ بشخ انا کنڈ آن زرکاری نا کچ داسکان کم ءِ۔ ہرانا سوب آن بدل گیگ زرکاری وسیلہ غاتا شون تننگ وخت انا اہم ءُ گرج اسے۔ وزیراعظم پارے کہ حکومت ہمو گام گیج آتے اولیت تننگ اٹی ءِ ہرافک پرائیویٹ بشخ انا کماشی ٹی زرکاری صنعت و برآمدات نا شون نا کمک اٹ پاکستان نا زرگزران ءِ سوگو و مدامگی بنداو تیا سلفنگ کیر۔ دیوان اٹی نائب وزیراعظم و وزیر خارجہ محمد اسحاق ڈار، وزیر مملکت برائے خزانہ بلال اظہر کیانی، خصوصی کمکار ہارون اختر و تعلقدار ادارہ غاتا بڑزکو افسر آک بشخ ہلکر۔