بیداد نا کسر نا خواہندار افن، ڈغار نا رکھ اکن پبی واکداری اٹ مون ایتنہ، ، ایرانی صدر مسعود پزشکیان

ایرانی صدر مسعود پزشکیان پارینے کہ ایران بیداد نا دنگ ءِ ودفنگ خواپک، او پیدوار کرے کہ ایران تینا امن، سلامتی و ڈغار نا رکھ اکن پبی و مچ آ واکداری اٹ مون ایتک۔ ایلو کنڈ آ ایران نا قائم مقام وزیرِ دفاع سید مجید ابن الرضا پارینے کہ ایران دشمن نا ہر دھڑکو ءِ سنجیدہ ہلسا تینا عسکری تیاری و دفاعی لائخی تے پین سوگو کیک۔ او امریکی صدر نا کنڈ آن ایران نا برخلاف پوسکن آ جلہو آتے پد بٹسا مذاکرات نا دوارہ بنا کننگ آ ردعمل تس۔ سوشل میڈیا ایکس آ جاری بیان اٹی سید مجید ابن الرضا پارے کہ دشمن نا داسہ نا بیانک نفسیاتی و درک نا جنگ انا بشخ اس مننگ کیرہ، ولے ننا نظر اٹی ہر دھڑکو راستی ءِ و اودے سنجیدہ ہلنگ المی ءِ‘ او پارے کہ نن نئے اناگت حالیت آتیا فریشان مرینہ و نئے غیر فعال مرینہ‘ نن ہر دھڑکو ءِ تینا تیاری تیٹی ودکی، دفاعی لائخی تا سوگوی و تینا واک اٹی پین ودکی نا بنداو جوڑ کینہ۔ داڑان مست صدر ٹرمپ ایران آ جلہو آتے پد بٹسا مذاکرات نا پڑو کریسس۔ او تینا سوشل میڈیا پلیٹ فارم ٹروتھ سوشل آ نوشتہ کرے کہ امریکہ ایران نا برخلاف ہمو عسکری واک، قوت و کارروائی کن پورو وڑ اٹ تیار ئس ہرانا درور ارٹمیکو جنگِ عظیم آن پد ملپک۔ ولے ایران و ایلو نیامی دے ٹک نا ملک آتا خواست آ کارروائی ءِ پد بٹنگا انتئے کہ اسہ سلاہ ئی معاہدہ اسے آ سجفنگ انگ ءِ‘ ہراٹی ہرمز تنک ءِدمدستی، پورو و بے اڑاند آن ملنگ و ایران نا جوہری خطرہ نا چٹفنگ ءِ اوار کننگا۔ دا رد اٹ ایرانی وزارت خارجہ نا ترجمان اسماعیل بقائی پارے کہ ہرمز تن انا بند مننگ امریکی قول آتا خلاف ورزی تون گنڈوک ءِ۔ اسہ انٹرویو اسے ٹی او پارے کہ امریکہ ایم او یو نا رِد اٹ بحری ہن و بر نا بحالی نا موکل تتو و وخت انا چٹنگ آن مست جلہو کرے۔ ترجمان ایرانی وزارت خارجہ پارینے کہ ایران عمان تون پوسکن آ بحری کسر آ ہیت و گپ کننگ اٹی ءِ‘ ہرمز تنک انا ملنگ عمان تون مذاکرات آن جتا ءُ باندات اسے۔ اسماعیل بقائی پارے کہ برطانیہ، بلغاریہ و یوکرین ایران جنگ اٹی اوار مفننگ نا باور کرفینو۔ ایلو کنڈ آ ایرانی پارلیمنٹ نا قومی سلامتی کمیٹی نا ترجمان حسن قشقاوی پارے کہ خیرخواک مفاہمتی یادداشت ءِ بحال کننگ نا کوشست کننگ اٹی ءُ۔ او دا ہم پارے کہ خیرخواہ تے سماءِ کہ دا وخت آ بنداوی ویل آتیٹی ہرمز تنک ہم اوار ءِ۔