حکومت نا کارکڑدءِ الس اسکان سرکننگ کن میڈیا حکمت عملی المی ءِ،ظہور بلیدی/ شعیب نوشیروانی

وزیراعلیٰ بلوچستان نا خصوصی پارت آ محکمہ ڈٹ بندی و شونداری و محکمہ خزانہ نا صوبائی وزیر آتتون اوار محکمہ حوالکاری بلوچستان نا اسہ اہم ءُ دیوان اس اڈ ہلک، ہراٹی صوبائی وزیر ڈٹ بندی و شونداری ظہور احمد بلیدی، صوبائی وزیر خزانہ شعیب نوشیروانی، سیکرٹری حوالکاری بلوچستان عمران خان و ڈائریکٹر حوالکاری سعید احمد شاہوانی اسک بشخ ہلکر۔ دیوان اٹی صوبائی حکومت نا کنڈآن السی راجی آسودہی، شونداری ڈٹ، زرگزرانی گام گیج و ایلو اہم بشخ آتے ٹی کروک گام گیج آتے گچین وڑ اٹ الس اسکان سرکننگ، حکومتی کارکڑدءِ تالان کننگ و میڈیا نا کمک اٹ السی رابطہ ءِ پین سوگو کننگ نا بابت گپ وتران مس۔ دیوان نا بنداوی مسخت صوبائی وزیر آتتون محکمہ حوالکاری نا کنڈآن میڈیا ٹیم تے گنڈنگ نا وڑوڈول آ سجفنگ ئس، تانکہ ہڑتوم آ وزارت آتے ٹی برجا شونداری و السی آسودہی سرجز، پالیسی گام گیج، ڈٹ و کارکڑدءِ وخت آ، گچین و کسبی وڑ اٹ میڈیا نا کمک اٹ تالان کننگ مرے۔ دا وخت آ سیکرٹری حوالکاری عمران خان پارے کہ داسہ ساڑی دور اٹی حکومت نا کارکڑدءِ الس اسکان سرکننگ کن پوسکن و گچین میڈیا سج پام المی ءِ۔ محکمہ حوالکاری صوبائی حکومت نا السی آسودہی گام گیج، شونداری ڈٹ و گڈ گورننس نا بابت مروک گام گیج آتے میڈیا نا کمک اٹ پبی وڑ اٹ مون آ اتنگ کن کل دوئی وسیلہ غاتے کاریم اٹ اتنگ ءِ۔ او پارے کہ میڈیا ٹیم تا گچین گنڈنگ آن صوبائی وزیر تا وزارت آتے ٹی برجاسرجزآتا وخت آ کوریج، پریس ریلیز، فوٹو و ویڈیو کوریج، ڈیجیٹل میڈیا و ایلو تشہیری وسیلہ غاتا کمک اٹ الس اسکان راست و مستند حوال سرکننگ اٹ کمک رسینگک۔ دیوان اٹی دا ہیت آ ہم زور تننگا کہ میڈیا ٹیمک تعلقدار صوبائی وزیر تا وزارت اتٓتون خڑک رابطہ ٹی مرسا ہڑدے نا بنداو آ اہم سرجز، شونداری ڈٹ، دیوان، فیلڈ وزٹ و السی آسودہی گام گیج آتا وخت آ محکمہ حوالکاری اسکان سرکیر، تانکہ اوفتا گچین میڈیا کوریج ءِ پک کننگ مرے۔ صوبائی وزیر ڈٹ بندی و شونداری ظہور احمد بلیدی و صوبائی وزیر خزانہ شعیب نوشیروانی محکمہ حوالکاری نا کنڈآن حکومتی کارکڑدءِ گچین وڑ اٹ الس اسکان سرکننگ کن کروک آ گام گیج آتا ستاءِ کریر و دا بابت محکمہ حوالکاری تون پبی کمکاری نا باور ی کرفیر۔ دیوان اٹی دا ہیت آ امنا کننگا کہ صوبائی حکومت شونداری، مالیاتی و السی آسودہی گام گیج آتے پوسکن میڈیا نا خواست آتتون ہم گرنچ کرسا پرنٹ، الیکٹرانک و ڈیجیٹل میڈیا نا کمک اٹ زیات گچین وڑ اٹ تالان کننگک، تانکہ حکومت نا کارکڑدو السی خذمت نا گام گیج آتے پبی وڑ اٹ الس نا مون آ اتنگ مرے۔