بھاز زُو بلوچستان ٹی مدامگی امن و سوگوی پک کننگ اٹ سرسہب مرینہ،گورنر جعفر خان مندوخیل

گورنر بلوچستان جعفر خان مندوخیل دا یقین نا درشانی ءِ کرینے کہ نن بھاز زُوت مچ آ صوبہ ٹی مدامگی امن و سوگوی ءِ پک کننگ اٹ سرسہب مرینہ‘ ساڑی حکومت و کانود نافذ کروک ادارہ غاتا کنڈ آن کروک داسہ نا گام گیج آک جم حالیت، السی رکھ و ہڑدے ئی زند اکن مثبت بھرم تننگ اٹی ءُ۔ گورنر مندوخیل دا ہیت آ زور شاغا کہ کل شاری تا جان و مال انا رکھ حکومت نا آئینی و انتظامی زمواری ءِ‘دا رد اٹ گورنر جعفرخان مندوخیل پارے، اہم قومی شاہراہ و واپاری کسر تے رکھوک جوڑ کننگ کن کل دوئی وسیلہ غاتے کاریم اٹ اتنگ انگ ءِ۔ ہرافتے ٹی چمن آن کراچی، تفتان آن کوئٹہ، و کوئٹہ غان جیکب آباد و ژوب اسکان نا کسرک اوار ءُ۔ صوبہ ٹی کل قومی شاہراہک واپار، ٹرانسپورٹیشن، رابطہ و علاقائی انضمام کن بھاز اہم ءُ۔ گورنر بلوچستان جعفرخان مندوخیل پارے کہ دا راست ءِ کہ بے امنی و سوگوی نا مفننگ نا کل آن بھلا نسخان ننا صوبہ نا لس مخلوق ءِ مننگ اٹی ءِ‘ ننے جوان احساس ارے کہ دا وخت آ ننا پوریاگر تپہ، زمیندار و چنکا کاروباری بندغ آک جتا جتا ویل و خواری تتون مون تروک ءُ ہرافک دراست صوبہ نا زرگزران و شونداری ءِ زہمی کیرہ۔ ننے سماءِ کہ مدامگی امن ودوک آ زرگزرانی و راجی شونداری نا بنداو ءِ۔ اقتصادی شونداری، سیاسی سوگوی، پوسکن آ زرکاری، روزگار نا وارخواہی و بلوچستان نا جم شونہالی کل انا سیبو اسہ پرامن، رکھوک و شوندار بلوچستان ءِ۔ گورنر بلوچستان جعفرخان مندوخیل صوبہ نا الس آ زور شاغا کہ او مدامگی امن کن حکومت و کانود نافذ کروک ادارہ غاتتون کمک اٹی تینا کڑد ءِ ادا کیر۔ کل سیاسی تنظیم آتا زمواری ءِ کہ او تینا صوبہ و السی فائدہ تیکن تینا بشخ انا کڑد ءِ ادا کیر۔ حکومت نا دا ارادہ نا دوارگی ءِ کررے کہ گورنر مندوخیل ہر شاری نا رکھ و ہر ضلع ٹی ریاست نا رِٹ ءِ سوگو کننگ کن نزور مفروک عزم کرینے۔ نن اسیجائی کوشست آتیان مون تروک چیلنج و تنکی تا مون ءِ آسانی اٹ توننگ کینہ۔