ٹرمپ نا تینا فوج ءِ ایران نا برخلاف اِرا ہفتہ غان برجا جلہو آتے توننگ نا پرمان

امریکی صدر ڈونلڈ ٹرمپ تینا فوج ءِ ایران نا برخلاف اِرا ہفتہ غان برجا جلہو آتے توننگ نا پرمان کرے و امریکی صدر پارے کہ کنے سماءِ کہ ایران دا وخت آ معاہدہ کن تیار اف ولے ای اوفتا ہیت آتے بننگ خواوہ۔ امریکی ویب سائٹ نا حوال نا رِد اٹ فیصلہ غان معلومدار حوالی پارے کہ صدر ڈونلڈ ٹرمپ امریکی فوج ءِ تدوک آ دے پرمان کریسس کہ ایران آ پوسکن ءُ جلہو کپس۔ حوال اٹی پاننگا کہ ٹرمپ نا دا رمان ایران آ تدوک آ 13 دے آن ہڑدے ئی بنداو آ منظور مروک جلہو آتا پدریسہ نا رد اٹ مون آ بسنے ولے داسکان دا پیدوار اف کہ ٹرمپ نا دا پرمان وختی وڑ اٹی ءِ یا برجا سلک۔ ویب سائٹ پارینے کہ امریکی صدر نا فیصلہ غان پیدوار مریک کہ او سفارت کاری ءِ وارخواہی تننگ نا خواہندار ءِ و ایلو کنڈ آ دا راستی ءِ ہم امنا کننگانے کہ بھلو کچ اسے ٹی فوجی جلہو آتے دوارہ بنا کننگ آن بیدس ہم امریکہ فضائی جلہو آتیان تینا مسخت آتے دوئی کننگ کرینے۔ حوال نا رِد اٹ امریکی فوج گمانی بھلا بَرّی آپریشن کن ڈٹ بندی کننگ اٹی ءِ ولے ٹرمپ دا بابت ہچ ءُ پارت اس داسکان کتنے و وائٹ ہاؤس ہم دا بابت ہچ ءُ ورندی اس تتنے۔ یات سلے کہ تدوک آ اِرا ہفتہ غان ٹرمپ نا کنڈ آن ایران آ جلہو آتا ہڑدے ئی بنداو آ منظوری تننگاکہ و منہ گھنٹہ ٹی کارروائی کننگاکہ۔ حوالی نا رد اٹ تدوک آ دے ٹرمپ ءِ ہندا وڑ انا ڈٹ رسینگا ولے او دادے پک کتو وخت اس کہ او فوج ءِ جلہو کپننگ نا پارت کرے، ڈونلڈ ٹرمپ فوج ءِ دا پرمان تے جاری کننگ آن دمدستی پد وائٹ ہاؤس اٹی حوالکار آتتون ہیت وگپ کرسا پارے کہ کن تون جلہو آتے برجا تخنگ یا اوفے ودفنگ نا آپشن ارے‘ ہراٹی اسُل ہر گڑا ءِ بھس کننگ ہم اوار ءِ‘ ڈونلڈ ٹرمپ پیدوار کرے کہ او تکک کہ دانش مندی تون سُج پام ہندادے کہ ایران تون معاہدہ کننگے۔ او پارے کہ نن دا وخت آ ایران تون ہیت کننگ اُن، کنا خیال اٹی او مہالو آن زیات سنجیدہ ءُ، نن ہم داڑکن پیدوار کارروائی کن تیار اُن ولے داکان پد ہم نن اوفتتون مذاکرات کننگ اٹی اُن۔ اوکان گڈ ٹرمپ حوالکار آتتون ہیت وگپ کرسا پارے کہ اودے گمان اف کہ ایران دا وخت آ معاہدہ کن تیار ءِ ولے ای اوفتا ہیت آتے بننگ خواوہ۔