بھارتی کاٹم خواجہی ٹی مروک دہشت گردی بلوچستان نا شونداری نا کسر اٹ اڑاند ءِ،وزیراعظم شہباز شریف

وزیراعظم شہباز شریف پارینے کہ بھارت نا کاٹم خواجہی ٹی مروک دہشت گردی بلوچستان نا شونداری، شونہالی‘ امن ءِ نسخان رسیفنگ نا لغوری ءُ کوشست اسے، ولے پاکستان دہشت گردی نا دا چیلنج نا پورو واک اٹ مون ءِ تورک۔ دہشت گردی نا چٹفنگ کن داتم اسکان 90 ہزار آن زیات پاکستانی تینا جان تے ندر کرینو۔ بلوچستان نیشنل ورکشاپ نا بشخ ہلوک آتیان تران کرسا وزیراعظم پارے کہ بلوچ و پشتون الس پاکستان نا جوڑ مننگ نا وخت آ تاریخی کڑد ادا کریر و تینا سرکڑدہی ٹی پاکستان اٹ اوار مرسا قومی سیوت ءِ سوگو کریر۔ او پارے کہ بلوچستان نا محب وطن سرکڑدہ غاک مدام قومی فائدہ ءِ جندی فائدہ غاتیا اولیت تسنو و صوبہ ملک انا تعمیر و شونداری ٹی پبی شریدار مسنے۔ وزیراعظم پارے کہ بلوچستان آبادی نا رِد اٹ کل آن چنکا ولے رقبہ نا رِد اٹ کل آن بھلا صوبہ ءِ‘ ہراڑے مُر انگا مزل و سخت انگا جغرافیہ شونداری ڈٹ آتیا زیات وسیلہ خڑچ کننگ نا خواست کیک۔ ہندا راستی ءِ مون آ تخسا 2010 نا این ایف سی ایوارڈ اٹی بلوچستان نا مالی حق آتیٹی نمان ودکی کننگا۔ او پارے کہ دا فیصلہ ٹی کل صوبہ غاک امنا کریر، وخت اس کہ پنجاب تینا منشا اٹ سال انا 11 ارب روپئی ودکی تننگ نا فیصلہ کرے و 2010 آن داتم اسکان 150 ارب روپئی بلوچستان ءِ تننگانے‘ او پیدوار کرے کہ دا کس آ تورو اس اف بلکن بنجائی سیوت و ایلمی نا خواست ئس۔ او پارے کہ میاں نواز شریف نا دورِ حکومت اٹی ہم بلوچستان نا شونداری کن ارب آ روپئی نا شونداری ڈٹ بنا کننگا، وخت اس کہ ساڑی حکومت ہم صوبہ نا روا انگا خواست آتے پورو کننگ ءِ اولیت تسنے۔ او پارے کہ بلوچستان نا کشاری ٹیوب ویل آتے شمسی توانائی آ گدریفنگ کن 75 ارب روپئی نا ڈٹ بنا کننگا، ہراٹی بنجا 50 ارب روپئی فراوان کرے، تاکہ کشارگر آتے بجلی نا بھلا لوڈشیڈنگ آن نجات رسینگے۔ وزیراعظم پارے کہ کراچی آن چمن اسکان این-25 شاہراہ، ہراڑے مست پدریسہ شکست آتا سوب آن اودے “خونی سڑک” پاننگاکہ، داسہ اودے پوسکنوڑ ایکسپریس وے ٹی بدل کننگ انگ ءِ‘ 300 ارب روپئی نا خڑچ آن جوڑ مروک آ دا ڈٹ انا پورو مننگ آن نئے بیرہ سفری آسراتیک جوان مریرہ بلکن نہادی السی زند آتا رکھ ہم مننگ کیک۔ او اومیت درشان کرے کہ بروک آ یک ونیم اِرا سال اٹی دا ڈٹ پورو مننگ آن پد دا شاہراہ شونداری، واپار و امن نا نشانی جوڑ مریک۔ او پارے کہ پاکستان نا راستی آ شونداری ہمیو وخت آ مننگ کیک ہراتم ہر چار آ صوبہ غاک بریبر ترندی اٹ مونی کار۔ اگہ بیرہ اسٹ یا اِرا صوبہ شون ہلیر و ایلوفک پدسلر تو اودے پاکستان نا شونداری پاننگ کپنہ۔ بنجا نا زمواری ءِ کہ ملک انا ہر بشخ ءِ بریبر شونداری نا وارخواہی فراوان کے۔ وزیراعظم بلوچستان اٹی داسہ نا دہشت گردی نا واقعہ غاتا ذکر ءِ کرسا جسٹس عبدالقادر و اونا سنگت کارندہ غاتتون اوار دہشت گردی ٹی شہید مروک آتے خراجِ تحسین پیش کرے و پارے کہ قوم دا قربانی تے ہچ گہس گیرام کپک۔