فیملی پلاننگ آگہی مہم ءِ یونین کونسل نا کہول اسکان تالان کننگے،گورنر بلوچستان جعفرخان مندوخیل

گورنر بلوچستان جعفرخان مندوخیل پارینے کہ اسہ ملک اسے نا آبادی بنداوی وڑ اٹ الس، اوفتا زندی آب، روزگار نا وارخواہی و اوفتا زرگزرانی آسودہی تون گنڈوک مریک۔ پاکستان نا آبادی ساڑی سال 2026 نا اخیر اسکان 26کروڑ اسکان سرمریک ہرا پاکستان ءِ اِرا بھلا چیلنج آتتون مون پہ مون کیک۔ اولیکو ترندی اٹ ودوک آ آبادی ءِ کم کننگ نا بست و بند ءِ‘ ارٹمیکو و شاید داڑان ہم زیات اہم، دا بھلا آبادی ءِ اسہ چاہندار‘ پیداواری، جانجوڑ و ہنرمند ورنا واکداری ٹی بدل کننگ ءِ۔ دا ہڑتوم آ بھلا چیلنجنگ زمواریک ءُ۔ اینو نا سرسہب دود اڈ تننگ آ پرنس آغا عمر احمدزئی و اونا مچ آ ٹیم ستا کڑزک۔ دا خیال آتا درشانی ءِ او کوئٹہ نا اسہ ہندی ہوٹل اسے ٹی ورلڈ پاپولیشن ڈے انا رد اٹ اڈ ہلوک دود انا بشخ ہلوک آتیان تران کرسا کرے۔ دا وخت آ صوبائی وزیر میر عاصم کرد گیلو، پارلیمانی سیکرٹری پرنس آغا عمر احمدزئی، صوبائی اسمبلی نا باسک ڈاکٹر نواز کبزئی، صوبائی سیکرٹری ظفر بلیدی، یو این ڈی پی نا ذوالفقار درانی، مسکوہی سینیٹر روشن خورشید بروچہ، بی آر ایس پی نا چیئرمین ملک انور سلیم کاسی، چیف ایگزیکٹو آفیسر ڈاکٹر طاہر رشید و ڈائریکٹر گورنر سیکرٹریٹ عطاء الرحمن خلجی تون اوار زند انا جتا جتا بشخ آتیان تعلقدار بندغ آک ساڑی ئسر۔ دا وخت آ تران کرسا گورنر بلوچستان جعفرخان مندوخیل پارے کہ دا ہیت پاکستان و بلوچستان ہڑتوم آتیکن است بڈی نا سوب ءِ کہ پاکستان مچ آ ڈیہہ انا کل آن ورنا آبادی والا ملک ءِ وخت اس کہ صوبہ بلوچستان تینا آبادی نا رِد اٹ پاکستان نا کل آن ورنا آبادی والا صوبہ ءِ۔ دا ورنا آبادی اسہ بھلو وارخواہی اسے نا نشاندہی ءِ کیک۔