ڈپٹی کمشنر کوئٹہ نا کماشی ٹی چہلم نا بست و بند آتا جاچ دیوان

ڈپٹی کمشنر کوئٹہ مہراللہ بادینی نا کماشی ٹی چہلم حضرت امام حسینؓ نا پرامن اڈ تننگ نا بابت ڈسٹرکٹ کوآرڈینیشن دیوان اڈ ہلک، ہراٹی سیکورٹی، سفائی، لائٹنگ، طبی آسراتی، ٹریفک و ایلو بست و بند آتا جاچ ءِ ہلنگا۔ دیوان اٹی شیعہ علماء کانفرنس، اسسٹنٹ کمشنرز، پولیس، ایف سی، صفاء کوئٹہ، میٹروپولیٹن کارپوریشن، پی ڈی ایم اے، ایم ایس بے نظیر بھٹو ہسپتال، سول ہسپتال، شیخ زاید ہسپتال، ڈی ایچ او کوئٹہ، ڈسٹرکٹ منیجر پی پی ایچ آئی، سوئی سدرن گیس کمپنی، کیسکو، انجمن تاجران و ایلو تعلقدار محکمہ غاتا افسر آک بشخ ہلکر۔ دیوان اٹی چہلم نا وخت آ جامع سیکورٹی پلان نا منظوری تننگا، وخت اس کہ جلوس نا روٹ آتیا سفائی، روشنائی و ایلو شاری آسراتی تا فراوانی ءِ پک کننگ نا پارت کننگا۔ کل سرکاری ہسپتال آتیٹی ایمرجنسی نافذ تخنگ، ایمبولینس آتے اسٹینڈ بائی تخنگ، و بجلی و گیس انا بے اڑاند فراوانی کن تعلقدار ادارہ غاتے المی گام گیج کننگ نا پارت کننگا۔ ڈپٹی کمشنر مہراللہ بادینی پارے کہ کوئٹہ ننا کل انا اُرا ءِ‘ اودے امن، ایلمداری و تین پہ تینی شرف انا بنجا جوڑ کننگ ننا کل انا اسیجائی زمواری ءِ‘ او کل تعلقدار ادارہ غاتے تین پہ تینی کمک و بھرمی حال حوال نا کمک اٹ چہلم نا پرامن و منظم اڈ تننگ ءِ پک کننگ نا پارت کرے۔