دہشت گرد آک تینا ناپاک ارادہ غاتیٹی ہچ سرسہب مننگ کپسہ،نوابزادہ میر زرین خان مگسی

پارلیمانی سیکرٹری سیل و سوات، دودوربیدہ و کانود نوابزادہ میر زرین خان مگسی مستونگ اٹ سیشن جج عبدالحکیم کاکڑ و اونا محافظ نا شہیدی وخت اس کہ ایڈیشنل سیشن جج طارق لاشاری نا ٹھپی مننگ نا است ہسون واقعہ غا ڈکھیائی و است ہسونی نا درشانی ءِ کرینے۔ نوابزادہ زرین خان مگسی پارے کہ شرفمند عدلیہ نا باسک آ جلہو اصل اٹ انصاف نا نظام، آئین نا بالادستی و ریاستی ادارہ غاتیا جلہو نا بریبر ءِ۔ دا وڑ انا لغور گام گیج آتیان دہشت گرد آک تینا پراگندہ ارادہ غاتیٹی وخت اس ہم سرسہب مننگ کپسہ، انتئے کہ مچ آ قوم و ریاستی ادارہ غاک دہشت گردی نا برخلاف اسٹ ءُ‘ نوابزادہ میر زرین خان مگسی پارے کہ دا واقعہ نا زموار و اوفتا کمکار آتے زوت عدالت نا مون آاتسا سخت سزا تننگک۔ شہید آتا قربانیک زیان مفسہ وامن دشمن تے ہر پڑآ بے سہبی تون مون تروئی تمک۔ او شہید سیشن جج عبدالحکیم کاکڑ و اونا گن مین نا خذمت آتے خراجِ تحسین پیش کرسا پارے کہ اوفک تینا فرض انا سرتننگ اٹ جان ءِ ندر کرسا اسہ روشنا درور اس جوڑ کرینو، ہرادے مدام شرفمندی اٹ یات تخنگک داکان بیدس او ٹھپی ایڈیشنل سیشن جج طارق لاشاری نا زوت دراخ جوڑی کن نیک انگا استخواہی نا درشانی ءِ کرسا پارے کہ حکومت اونا درمان نا کل المی بست وبند آتے پک کننگ ءِ او مستی پارے کہ بلوچستان حکومت الس نا جان و مال انا رکھ، امن و سوگوی نا مون آ دننگ، کانود نا حکمرانی و دہشت گردی نا پورو چٹفنگ کن کل تعلقدار ادارہ غاتتون اواری اٹ گام گیج آتے جاری تخانے صوبہ ٹی مدامگی امن حکومت نا اولیت ءِ و دہشت گردی نا ناچوڑ نا چٹفنگ اسکان دا جہد پورو واک و قومی امنائی سلاہ تون برجا سلک۔