سیکورٹی فورس آتا کارروائی،مستونگ نا علاقہ کھڈ کوچہ ٹی فتنہ الہندوستان نا 4 دہشت گرد خلنگار

سیکورٹی فورس آتا بلوچستان اٹی مستونگ نا علاقہ کھڈ کوچہ ٹی سرسہب کارروائی نا وخت آ فتنہ الہندوستان نا 4 دہشت گرد دوزخی و چندی دہشت گرد آک ٹھپی مسنو۔ سیکورٹی حوالی نا رداٹ سیکورٹی فورس آتا انٹیلی جنس بیسڈ آپریشن ‘العزم’ نا رداٹ بلوچستان اٹی دہشت گردی نا برخلاف پبی و گچین کارروائیک برجاءُ۔ سیکورٹی فورس آک بلوچستان اٹی مستونگ نا علاقہ کھڈ کوچہ ٹی سرسہب کارروائی ٹی فتنہ الہندوستان نا 4 دہشت گرد آتے دوزخی کریر۔ سرسہب آپریشن نا وخت آ خلنگوک آ دہشت گرد آتیان بھلو کچ اسے ٹی سلہہ و گولہ بارود ہم دوئی مس۔ سیکورٹی فورس آک دہشت گرد آتا کاریم اٹ بروک موٹرسائیکل آتے ہم ضبط کریر۔ سیکورٹی حوالی نا رداٹ سیکورٹی فورس آتا گچین کارروائی ٹی فتنہ الہندوستان نا چندی دہشت گرد آتا ٹھپی مننگ نا ہم پک حوال آک ءُ۔ سیکورٹی فورس آتا کارروائی نا وخت آ دہشت گرد آتا کمکاری نا زموار شکبر بندغ آتے ہم دزگیر کننگا۔ آپریشن نا وخت آ علاقہ ٹی سرچ و کلیئرنس کارروائیک برجاءُ، سیکورٹی فورس آتا کنڈآن نظر تخنگ انگ ءِ۔ ساڑی دے تیٹی مستونگ نا علاقہ کھڈ کوچہ ٹی دہشت گرد آتا پراگندہ کارروائی تیان پد سیکورٹی فورس آتا کنڈآن انٹیلی جنس بیسڈ آپریشن آتے ترند کننگا۔ سیکورٹی حوالی پارینے کہ دہشت گردی نا چٹفنگ و ڈیہہ اٹی امن و ایمنی اسکان سیکورٹی فورس آتا کارروائیک پدریسہ برجا سلرہ۔بنجائی وزیر داخلہ محسن نقوی بلوچستان نا ضلع مستونگ اٹ سیکورٹی فورس آتا کنڈآن بھارتی سپانسرڈ دہشت گرد آتا برخلاف سرسہب آپریشن آ ورناتے خراج تحسین پیش کرینے، وزیر داخلہ بیان اٹ کارروائی نا وخت 4 دہشت گرد آتے دوزخی کننگ آ سیکورٹی فورس آتا بڑزکو کسبی لائخی تا ستاءِ کرسا پارے کہ فورس آتا وخت آ و گچین کارروائی کرسا دشمن زموار آتا پراگندہ عزم ءِ مش تا کرینو۔ محسن نقوی پیدوار کرے کہ سیکورٹی فورس آک بلوچستان اٹ امن و ایمنی و دہشت گرد آتا ماس کش کننگ کن پبی و گچین کارروائی تے برجا تخانو۔ او پارے کہ فتنۃ الہندوستان و فتنہ الخوارج نا پراگندہ اواری ہچ ءُ وڑ اسے ٹی وطن عزیز نا امن ءِ بھس کننگ کپک۔ او پارے کہ دہشت گردی نا برخلاف دا جنگ اٹ مچ آ ملک تینا بہادر و غیرتی سیکورٹی فورس آتتون ہم کوپہ سلوک ءِ۔