السی بنداوی آسراتی تا فراوانی نا بابت ہچ ءُ ڈیوالئی اس سگپنہ،کمشنر لورالائی ڈویژن

کمشنر لورالائی ڈویژن ولی محمد بڑیچ نا کماشی ٹی ڈویژنل ڈائریکٹرز نا محکمانہ شونداری جاچ دیوان کمشنر آفس لورالائی ٹی اڈ ہلک، ہراٹی لورالائی ڈویژن نا کل محکمہ غاتا ڈویژنل سروک و تعلقدار افسر آک بشخ ہلکر۔ دیوان نا وخت آ جتا جتا محکمہ غاتا افسر آک جولائی 2025 آن جون 2026 اسکان نا سالانہ محکمانہ کارکڑد، شونداری سرجز و السی خذمت آتا فراوانی آ تالان جم پیش رفت رپورٹ و پریزنٹیشن پیش کریر۔ کمشنر ولی محمد بڑیچ دیوان آن تران کرسا پارے کہ شونداری ڈٹ آتے وخت آ و آب اٹ پورو کننگ حکومت بلوچستان نا اولیکو اولیت اٹی اوار ءِ‘ کل محکمہ غاک برجا شونداری اسکیم آتا کاریم ءِ پین ترند کیر، فنڈ انا شفاف و بھرمی کاریم اٹ اتنگ ءِ پک کیر و الس ءِ بنداوی آسراتی تا فراوانی ٹی ہچ ءُ وڑ اسے نا ڈیوالئی سگنگ مفک۔ دیوان اٹی جتا جتا محکمہ غاتا کنڈ آن برجا و پورو مروک شونداری ڈٹ آتا مادی و زرگزرانی پیش رفت، السی خذمت آتا فراوانی، فیلڈ وزٹ، مانیٹرنگ، جاچ ہلنگ و ادارہ ئی اصلاحات و مون تروک ویل آتیا سرجم بریفنگ تننگا۔ دا وخت آ شونداری ڈٹ آتیٹی مون آ بروک اڑاند، فنڈ انا بھرمی کاریم اٹ اتنگ، بین المحکماتی ہم گرنچی، ڈٹ آتا وخت آ پوروی و بروک آ مالی سال نا اولیت آتیا ہم خوڑتی اٹ سجفنگا۔ کمشنر لورالائی ڈویژن کل ڈویژنل ڈائریکٹرز آتے پارت کرے کہ او شونداری ڈٹ آتا پدریسہ چاروکی، شفافیت، آب و پک کروک وخت اٹ پوروی ءِ پک کیر۔ او زور شاغا کہ ہر محکمہ السی آسودہی نا ڈٹ، بنداوی پنجر نا جوانی، تعلیم، جانجوڑی، آبنوشی، کشت وکشار‘مواصلات و ایلو بشخ آتیٹی برجا اسکیم آتا پیش رفت آ خاص چکار کے و مون تروک ویل آتا ایسری کن قابلِ عمل سلاہ تننگے۔ دیوان اٹی دا فیصلہ ہم کننگا کہ کل محکمہ غاک تینا کارکڑد نا باقاعدہ جاچ ءِ برجا تخرہ، شونداری ڈٹ آتا پیش رفت نا پدریسہ مانیٹرنگ کننگک و السی فائدہ نا ڈٹ آتے پن کروک وخت اٹی پورو کننگ کن کل دوئی وسیلہ غاتے کاریم اٹ اتنگک تانکہ لورالائی ڈویژن اٹی مدامگی شونداری و گچین السی خذمت آتا حکومتی ہدف آتے دوئی کننگ مرے۔