نائب وزیراعظم نا فلپائن اٹی ایشیائی بینک انا ہیڈکوارٹرز نا دورہ

نائب وزیراعظم و وزیر خارجہ سینیٹر محمد اسحاق ڈار چارشنبے نا دے آفلپائن نا دارالحکومت منیلا ٹی ایشیائی ترقیاتی بینک (اے ڈی بی) نا ہیڈکوارٹرز نا دورہ ءِ کرے ہراڑے سینٹرل اینڈ ویسٹ ایشیا ڈیپارٹمنٹ نا ڈائریکٹر جنرل لیہ گٹیریز اودے بخیرکرے۔ دفتر خارجہ نا رداٹ نائب وزیراعظم بننگ آ اے ڈی بی نا وزیٹرز بک اٹی تینا ہیت آتے ہم نوشتہ کرے۔ اوکان پد ایشیائی شونداری بینک اٹی پاکستان نا ایگزیکٹو ڈائریکٹر نشیطہ محسن نائب وزیراعظم کن ورکنگ لنچ اسے نا بست وبند کرے ہراٹی اے ڈی بی نا چندی بشخ و ڈیہہ تیٹی بڑزکو عہدہ غاتیا خذمت کروک پاکستانی شخصیت آک بشخ ہلکر۔ اوڑدہی نا وخت آ ایشیائی شونداری بینک انا بدل مروک شونداری ایجنڈا، پاکستان تون اونا شریداری و بینک انا چندی بشخ و علاقہ ڈیہہ تیٹی خذمت آتا پیش رفت اٹی پاکستانی پروفیشنلز نا اہم کڑد آ گپ و تران کننگا۔ نائب وزیراعظم اے ڈی بی نا مشن اٹی اوفتا خذمت آتا ستاءِ کرسا پارے کہ ادارہ ٹی تینا سرکڑدہی لائخی و چاہنداری نا کمک اٹ اوفک پاکستان کن گرم ناسوب ءُ۔ نائب وزیراعظم نشیطہ محسن ءِ ایشیائی شونداری بینک اٹی پاکستان نا ایگزیکٹو ڈائریکٹر نا زمواری تے سنبھالنگ آ مبارکبادی تس و پاکستان و اے ڈی بی نا نیام اٹ کمکاری ءِ پین مون مون آ دننگ کن نیک است خواہی نا درشانی ءِ کرے۔