کمشنر لورالائی نا پارت آ شار اٹی سفائی مہم برجا ءِ

صوبائی حکومت نا وژن، کمشنر لورالائی ڈویژن ولی محمد بڑیچ نا پارت و چیف آفیسر میونسپل کمیٹی لورالائی محب اللہ بلوچ نا پارت و چاروکی ٹی مچ آ شار اٹی خاص سفائی مہم پبی وڑ اٹ برجا ءِ۔ شاری تے سفا، جانجوڑ و گچین چاگڑد نا فراوانی کن میونسپل کمیٹی لورالائی نا کارندہ غاک جتا جتا علاقہ غاتیٹی نالی‘ گلی بشامی ڈور و کھدکتر نا وخت آ سفائی ءِ پک کننگ اٹی ءُ۔ سفائی آپریشن نا وخت آ ملا خدر نیکہ قبرستان نا بشامی ڈور‘ لیویز لائن، حریف گلی، کامران صاحب ٹپ، ایس ایس پی دفتر، ٹھنڈا مسجد، ڈاکٹر سعادت ہسپتال، حنظلہ مسجد، امیر زمان محلہ، اے کیو خان اسکول، چکی گلی، جان محمد گلی، کباڑی اسکول و مسکوہی نادرا دفتر نا ایب کیب انا نالیہ و گلی تا سفائی کننگا، وخت اس کہ السی غاو رسینگ آ منہ ہند آتیا دوارہ سفائی ہم کننگا۔ سفائی آپریشن اٹی ٹریکٹر ٹرالی، سوزوکی و ایلو مشینری کاریم اٹ اتنگا۔ ہندا رد اٹ شار انا جتا جتا ہند آتیا خلنگوک درخت آتے باقاعدگی اٹ دیر تننگا تانکہ شجرکاری مہم ءِ بھرمی جوڑ کننگ مرے، درخت آتا جوان خیالداری مرے و و شاری تے سرسوز، سفا و گچین چاگڑد اس دوئی مرے۔ چیف آفیسر میونسپل کمیٹی لورالائی محب اللہ بلوچ تعلقدار کارندہ غاتے پارت کرے کہ سفائی مہم ءِ پین بھرمی جوڑ کننگے، کل علاقہ غاتیٹی بے اڑاند سفائی و نکاسی آب انا نظام ءِ فعال تخنگے و شاری ویل آتا دمدستی ایسری ءِ پک کننگے۔ او شاری تیان خواست کرے کہ او سفائی ءِ برجا تخنگ اٹی میونسپل کمیٹی تون کمک کیر، کھدکتر ءِ پن کروک ہند آتیا بٹیر و تینا شار ءِ سفا، سرسوز و زیبا جوڑ کننگ اٹی کڑد ادا کیر۔