سعودی عرب آ مروک جلہو آتیان ڈیہہ اٹی امن و سوگوی ءِ پین نسخان رسینگک،وزیراعظم شہباز شریف

وزیراعظم شہباز شریف تینا بیان اٹی پارینے کہ دا وڑ انا مذمت نا قابلِ گام گیج آک سعودی عرب نا وتواجہی و علاقائی سلامتی نا خلاف ورزی ءُ، دا گام گیج آتیان ڈیہہ نا امن و سوگوی ءِ پین نسخان رسینگ نا گمان ءِ‘ شہباز شریف پارے کہ پاکستان سعودی عرب نا سلامتی کن تینا نزور مفروک مخ تفی نا دوارگی ءِ کیک، پاکستان دا نازرک آ وخت اٹی ایلم ملک سعودی عرب تون پورو یکجہتی نا درشانی ءِ کیک۔ او پارے کہ پاکستان ڈیہہ ٹی امن، سوگوی، سلامتی و افہام و تفہیم کن سِخت اٹ کروک کوشست آتا مخ تفی ءِ برجا تخک۔ یات سلے کہ تدوک آ دے سعودی عرب نا ابہا ایئر پورٹ آ حوثی باغیک میزائل جلہو کریسر۔ ایلو کنڈ آ اماراتی وزارت دفاع نا رِد اٹ جلہو نا سوب آن اسہ جہاز اسے نا کارندہ غاتیان اسہ بھارتی باسک اس زوال و 8 بندغ ٹھپی مسر۔ وزارت دفاع پیدوار کرے کہ دا جلہو ہرمز تنک انا سویلی کسر اٹی ہمو وخت آ کننگا ہراتم ہڑتوم آ ٹینکر آک عمانی سمندری دنگ اٹی ساڑی ئسر۔ وزارت نا رِد اٹ زوال مروک ملاح آئل ٹینکر مومباسا بی آ سوار ئس وخت اس کہ ٹھپی مروک 8 بندغ آتیٹی 4 انا حالیت خراب ءِ‘ ٹھپی تیٹی 6 بھارتی و 2 یوکرینی شاری اوار ءُ۔ ابوظبی نیشنل آئل کمپنی نا شپنگ کمپنی ADNOC L&S ولدا پک کرے کہ خام تیل ہرفوک آ جہاز مومباسا بی و البہیہ ہرمز تنک آن تدینگ نا وخت آ شست مسر و اوفتے نسخان رسینگا۔ اماراتی وزارت دفاع نا رد اٹ جلہو تیان پد ہڑتوم آ ٹینکر آتیٹی خاخر لگا ہراڑان مالی نسخان مس ولے خاخر ءِ کسفنگانے‘ ایلو کنڈ آ بھارت نا وزارت خارجہ ہرمز تن انا خڑک آ متحدہ عرب امارات نا میراتی اِرا آئل ٹینکر آ جلہو آن پد نئی دہلی ٹی ایران نا نائب سفیر ءِ بٹنگانے۔ ایلو کنڈآ ایران نا پاسدارانِ انقلاب دعویٰ کرینے کہ ہرمز تنک اٹی اِرا سپر ٹینکر ءِ شست کرسا بیکار کننگا۔ پاسداران نا رِد اٹ دا جہاز آک کیہی وارننگ آتے گوجالار، تینا نیوی گیشن سسٹم آتے بند کریر و ہمو کسر آن تدینگ نا کوشست کریر ہرادے پاسدارانِ انقلاب بارودی سرنگ والا کسر گونداسس۔ ولے پاسداران نا بیان اٹی دا جہاز آتا پن پیدوار کننگ تنے و نئے دا پک پاننگانے کہ دا ہمو ٹینکر آک ءُ ہرافتا ذکر ءِ متحدہ عرب امارات نا وزارتِ دفاع کرینے۔ دا رد اٹ ایرانی پارلیمنٹ نا قومی سلامتی کمیشن نا ترجمان ابراہیم رضائی امریکہ تون چک وتاڑ اٹی ودکی آن پد اسہ بیان اسے ٹی پارے کہ داسہ ہچ ءُ مفاہمتی یادداشت اس کاریم اٹی بننگ کن سلتنے انتئے کہ دشمن باقاعدہ وڑاٹ جنگ اٹی پترینگانے، دشمن مفاہمتی یادداشت نا کل ٹِک آتا خلاف ورزی ءِ کرینے۔ ابراہیم رضائی پارے کہ ہرمز نا سلامتی، مدامگی شونداری نا اسٹریٹجک ایکشن پلان تدوک آ نن پارلیمنٹ اٹی پیش کننگا، ہرمز تنک تتون تعلقدار اسٹریٹجک ایکشن پلان پارلیمنٹ اٹی منظور کننگانے۔