حقدار بے روزگار آتے آسراتی فراوان کننگ ءِ اولیت تننگک،بریگیڈئیر ظفر اقبال

ایف سی ساؤتھ پنجگور رائفلز نا کنڈ آن پنجگور نا جنوزان، یتیم، نیم جان و بے روزگار ورنا تے شرفمند روزگار کن ٹوکن بشخ و بانٹ کننگا، پنجگور رائفلز نا کمانڈنٹ بریگیڈئیر ظفر اقبال تینا اٹ شرفدار ءُ دود اسے ٹی جنوزان، یتیم، نیم جان و بے روزگار ورنا تے ٹی ٹوکن بشخا۔ ٹوکن بشخ و بانٹ نا دا دود اٹی پرو وائس چانسلر مکران یونیورسٹی سعادت بلوچ، چیئرمین ڈسٹرکٹ کونسل عبدالمالک صالح بلوچ، عالمِ دین مولوی علی احمد، مولانا عبدالعلیم، انجمن تاجران نا صدر فرید نواز بلوچ تون اوار سرکڑدہ، سیاسی راہشون، پوریاگر، راجی شخصیت و الس بھلو کچ اسے ٹی بشخ ہلک۔ دود اٹی السی و سیاسی تپہ غاک ایف سی بلوچستان پنجگور رائفلز و بریگیڈئیر ظفر اقبال نا الس دوست سُج پام تا بھاز ستاءِ کریر۔ دود اٹی ڈسٹرکٹ کونسل نا چیئرمین عبدالمالک صالح بلوچ، مکران یونیورسٹی نا پرو وائس چانسلر سعادت بلوچ و انجمن تاجران نا صدر فرید نواز بلوچ تران کرسا پاریر کہ نیزگار الس ءِ روزگار و پوریا فراوان کننگ پنجگور رائفلز نا اسہ جوان ءُ گام اسےِ ہراڑان الس ءِ شرف اٹ روزگار و نیزگار الس ءِ تینا اُرا تے چلیفنگ اٹی بھلو آسانی اس رسینگک‘ ایف سی پنجگور رائفلز نا کمانڈنٹ بریگیڈئیر ظفر اقبال دود اٹی پارے کہ سیم انا کاروبار اٹی شفافیت و حقدر و بے روزگار بندغ آتے آسراتی فراوان کننگ ننا اولیت آتے ٹی اوارءِ۔ نن خوانہ کہ ہرافک دا پوریا نا حقدار ءُ اوفتے آسراتی رسینگے۔ او پارے کہ ٹوکن تا بشخ و بانٹ نا دا مسٹمیکو ریسہ ءِ، اولیکو ریسہ ٹی نن جنوزان، ارٹمیکو ریسہ ٹی نیم جان و داسہ مسٹمیکو ریسہ ٹی یتیم و بے روزگار آتے ٹوکن فراوان کرسا اوفتے شرف اٹ روزگار نا وارخواہی فراوان کرین او پارے کہ پنجگور اسہ شوندار ءُ علاقہ اسے‘ داڑے کِشت و کِشار نا کل وسیلہ غاک ساڑی ءُ، پنجگور نا الس ءِ تیل انا پوریا غا سیبو کننگ نا جاگہ غا خواری، کسب و کِشت و کِشار آ چکار کروئی تمک‘ ننے تیل اتنگ نا جاگہ غا خواری و کِشت و کِشار آ چکار کننگ نا گرج ءِ۔ ایران و امریکہ نا نیام اٹی معاہدہ غان پد تیل انا دا پوریا نا ریسہ زوت ایسر مریک، ننے بدل گیگ روزگار پٹوئی مریک‘ نن کوشست کننگ اٹی اُن کہ ورنا تیٹی سُج پام ودی کرسا اوفتے شرف اٹ روزگار فراوان کننگے۔ ضلع پنجگور نا تینا بھلا ربیدگی میراتءُ، ننے تینا بھلا تا رند ءِ درسا علاقہ غان بے امنی و بشخ و بانٹ نا پالیسی ءِ چٹفوئی ءِ‘ جنگ و جھیڑہ راج ءِ غلط آ کسر آ دیک‘ ننے شون، تعلیم، آسودہی، امن و شعور نا کنڈ آ ہننگ نا گرج ءِ۔ پنجگور (نامہ نگار)