کوہلو ٹی کیہی وخت آن برجا ملیریا پروگرام نا بے سہبی نا غاو

کوہلو ٹی ملیریا پروگرام کیہی وخت آن برجا ءِ ولے ارمان اٹ پاننگ انگ ءِ کہ دا پروگرام پورو وڑ اٹ بے سہب خننگ انگ ءِ۔ مچ آ ضلع ٹی ملیریا پروگرام نا رداٹ جتا جتا علاقہ غاتیٹی سینٹر جوڑ کننگانے ولے اوکان پد ہم ملیریا نا کیس و غاو تیٹی پدریسہ ودکی مننگ اٹی ءِ ہراڑان تعلقدار ادارہ غاتا کارکڑد آ سوجی ٹِک ہرفنگ انگ ءِ۔ السی تپہ غاک پارینو کہ ملیریا پروگرام نا منہ کمامدار بیرہ دفتر آتسکان کچ اٹی ءُ و عملی وڑ اٹ ہچ ءُ بھرمی ءُ گام گیج اس کپننگ انگ ءِ۔ ایلو کنڈ آ الس غاو کرینے کہ تدوک آ پنچ سال آن ملیریا پروگرام نا کنڈ آن مچھر دانی بشخ و بانٹ کننگتنے۔ شاریک ڈپٹی کمشنر کوہلو عظیم جان دمڑ، ڈی ایچ او کوہلو ڈاکٹر شیرزمان مری، ملیریا پروگرام نا بڑزکو کمامدار و ضلعی انتظامیہ غان خواست کرینو کہ کوہلو ٹی ملیریا پروگرام نا کارکڑد نا دمدستی نوٹس ہلسا شفاف جاست پاست کننگے و ڈیوالئی کروک کارندہ غاتا برخلاف کارروائی کننگے تانکہ الس ءِ جوان جانجوڑی آسراتیک رسینگ کیر۔