لس گچین کاریک بایدے اسہ دے آ مریر، اسپیکر قومی اسمبلی

اسلام آباد : اسپیکر قومی اسمبلی راجہ پرویز اشرف پارینے کہ لس گچین کاری تا اسہ دے اٹی مننگ ملک انا فائدہ ٹی ءِ۔ گچین کاری تا اڈتننگ اٹ الیکشن کمیشن، حکومت و غٹ سیاسی جماعت آک اہم فریق ءُ، ملک انا زرگزرانی و سیاسی سوگوی کن گپ وتران نا کسرءِ اختیار کروئی مریک، مشکل حالیت آتیٹی فوڈ سیکورٹی اسہ بھلو چیلنج اسے ہراڑتون مون تننگ کن کشارگر تے آسراتی فراوان کروئی تمک، سے شنبے نادے آ داڑے پاکستان انسٹی ٹیوٹ آف پارلیمنٹری سروسز(پپس) اٹی چاگڑدی اعتبار اٹ کشاری و فوڈ سیکورٹی نا چیلنج و آخبت نا لائحہ عمل نا بابت مکالمہ نا دود آن تران کرسا اسپیکر قومی اسمبلی پارے کہ لس گچین کاری تا اسہ دے اٹی اڈتننگ ملک انا گیشتر فائدہ ٹی ءِ۔ غٹ اسٹیک ہولڈر آک دا باندات آ یکسوئی اٹ باہم گپ وتران نا کسر ءِ اختیار کیر انتئے کہ سیاسی نزوری آن ملک ءِ مہالو آن بھاز نسخان ہرفوئی تمانے، پارلیمنٹ سیاسی جماعت آتیٹی گپ وتران نا کسر ءِ آوار کننگ کن تیار ءِ، ملک ءِ مون تروک چیلنج آتا ایسر پارلیمان نا کمک اٹ ہی مننگ کیک، ملک انا زرگزرانی و سیاسی سوگوی کن گپ وتران نا کسر ءِ اختیار کننگ بھاز المی ءِ انتئے کہ زرگزرانی سوگوی سیاسی سوگوی تون گنڈوک ءِ۔ اوپارے کہ پاکستان اسہ کشاری ءُ ملک اسے، کشاری ملک اٹی خولم نا کمتی بایدے مف اگہ نن تینا بزغرآتے آسراتی فراوان کینہ تو اوفتا پیدوار اٹی ودکی مریک، ڈالر اٹی خولم نا ہلسا الس ءِ ریلیف تننگ اسہ مشکل ءُ کاریم اسے، بزغرآتا سپورٹ نا کمک اٹ ملک اتی خولم نا کمتی ءِ پورو کننگ مریک، پاکستان موسمیاتی بدلی آن غٹ آن زیات زہمی مروک آ ملک ءِ، موسمیاتی بدلی تا غٹ وڑک ننے زہمی کرینو، پاکستان اٹی تدوک آ سال بروک آ نوکاپ آن بھاز زیات بھسکاری بسنے، قوم تیا ہراتم مشکل بریک تو اونا مقابلہ ءِ ہم او ہموعزم اٹ کیک، ملک انا غٹ بشخ آتیٹی ساڑی دانشور آک ملک ءِ مشکل آتیان کشنگ اٹ کمک کیر، جاپان، جرمنی و اٹلی ٹی قومک مشکل آتا مقابلہ ءِ کریر، اینو ہمو قومک شونداری نا کنڈا ہِننگ ءُ۔ راجہ پرویز اشرف نا پاننگ ئس کہ پاکستان ءِ اللہ تعالیٰ بے شمار نعمت تسنے، اللہ تعالیٰ نا کنڈآن تروک آ نعمت آتے کاریم اٹ اتسا ملک ءِ مشکل حالیت آتیان کشنگ مریک، موسمیاتی بدلی تتون مون تننگ کن بزغرآتیکن پوسکن آ نظام ءِ درستی راستی کرفنگ ننا اسیجائی زمواری ءِ، ساڑی ٹیکنالوجی آن فائدہ ہرفسا موسمیاتی بدلی تون مون تننگ مریک۔ اوداہیت آ زور شاغا کہ ملک ءِ ویل آتیان کشنگ کن اسیجائی کوشست آتا گرج ءِ، ملکی زرگزرانی حالیت آتون مون تننگ کن ننے مشکل فیصلہ کننگ نا گرج ءِ۔

(اے پی پی)