بلوچستان عوامی انڈومنٹ فنڈ اٹ 2ارب روپئی ودفنگ نا منظوری

کوئٹہ(آن لائن)وزیراعلیٰ بلوچستان میر عبدالقدوس بزنجو بلوچستان عوامی انڈومنٹ فنڈ اٹی 2ارب روپئی پین ودفنگ نا منظوری کرینے، دا فیصلہ غان پد انڈومنٹ فنڈ انا کل مالیت 6 ارب روپئی اسکان سر مسنے، تدوک آ دے وزیراعلیٰ بلوچستان میرعبدالقدوس بزنجو نا کنڈ آن محکمہ راجی آسراتی نا کنڈ آن راہی کروک سمری نا منظوری ءِ تننگا۔ ہراٹی بلوچستان عوامی انڈومنٹ فنڈ اٹی ودکی نا خواست کننگاسس۔ اعلامیہ نا رد اٹ فنڈ اٹی 2ارب روپئی پین ودفنگ نا منظوری تننگانے۔ وزیراعلیٰ بلوچستان نا منظوری آن پد بی اے ای فنڈ انا کل مالیت 6ارب روپئی اسکان سر مسنے۔ داکان مست دا فنڈ چار ارب روپئی ئسکہ، و بنائی وڑ اٹ دا بیرہ اِرا ارب روپئی آن بنا کریسس۔ نیام اٹ مسکوہی وزیر اعلیٰ جام کمال خان دادے دوکچ کننگ نا منظوری تس، تدوک آ منہ تُو آن دا فنڈ انا کچ چار ارب روپئی ئسکہ۔ مریض آتا ودنگ و دا فنڈ انا کاریمی مننگ نا سوب آن محکمہ نا کنڈ آن داٹی پین ودکی نا خواست کننگاسس، دا خواست انا منظوری آن پد دا فنڈ انا جم مالیت شش ارب اروپئی مسنے۔ دا رد اٹ وزیر اعلیٰ پارے کہ فنڈ انا سیڈ منی ٹی ودکی ناجوڑ آتا درمان نا پروگرام ءِ پین سوگو کننگ کن ءِ۔ بلوچستان عوامی انڈومنٹ فنڈ ملک انا یکتا انگا پر وگرام ءِ، ہرا غریب و حقدار بندغ آتا بے پرخ گچین درمان نا آسراتی کن ءِ۔ بی اے ای فنڈ آن بھلا ناجوڑی تا پلویڑ اٹ بروک بیوس و غریب الس ءِ درمان ان آسراتی تننگ انگ ءِ۔ بی اے ای فنڈ انا پینل آ کوئٹہ غان بیدس ملک انا ایلو ہسپتال آک ہم اریر، کینسر، جغر، است و بک آتا ناجوڑی تیٹی اختہ بندغ آتا بھلو کچ اس درمان کن اڈ تروک دا پروگرام آن فائدہ ہرفنگ اٹی ءِ۔