سوراب اٹ ادارہ غاتا نزور کارکرد سگ آن پیشن ءِ، غلام سرور بروہی

سوراب: ریجنل ڈائریکٹر وفاقی محتسب غلام سرور بروہی نا کماشی ٹی ڈی سی کمپلیکس سوراب اٹ اڈ ہلوک اُلسی کھلی کچہری ٹی شاریک سوراب اٹ انتظامیہ و سرکاری ادارہ غاتا خراب کارکڑد آ ترند مس۔ بنجائی محتسب نا مون آ اُلسی ویل آتیٹی افسر تا پدی کننگ‘خلقی علاقہ غاتون امتیازی سلوک، روڈ آتا حالیت نا خرابی‘ نوکاپ نا زہمی تا حالیت آتا خرابی، محکمہ جانجوڑی نا لاپروائی و ڈیوالئی نا سوب آن سٹی آ ڈاکٹر آتا گیشتری تون اوار ایلو ویل آتا ایسری آن غاو تا ڈیر اس خلکنو۔ امن و ایمنی نا جوڑی ٹی انتظامیہ نا خراب انگا کارکڑد محکمہ مواصلات و محکمہ جانجوڑی کل آن زیات تنقید نا گواچنی مس۔ وخت اس کہ ڈسٹرکٹ ہیلتھ آفیسر سوراب تون اوار کیہی ایلو سرکاری محکمہ غاتا ضلعی افسر تا ڈیوٹی آن غائب مننگ نا معاملہ ءِ ہم کھلی کچہری ٹی ہرفیر۔ یونین کونسل مولی نا چیئرمین حافظ خلیل الرحمان لہڑی‘ میر محمد ہاشم سمالانی‘ٹکری محمد صالح میروانی‘ انجینئر حبیب زہری‘میر مقبول گرگناڑی‘ محمد اقبال سمالانی بنجائی محتسب نا ساڑی گری ٹی اڈ ہلوک کھلی کچہری ٹی علاقائی ویل آتے جوان وڑاٹ پاش کرسا ایسر کننگ کن گام گیج آ زور شاغنگا۔

(آن لائن)