اطالوی فٹبال لیگ‘ چیمپئن یوونٹس آتے نزور حریف کیگلیاری تون اپ سیٹ بے سہبی

روم (مانیٹرنگ ڈیسک) اطالوی فٹبال لیگ اٹ چیمپئنز مرسا یووینٹس نا غرور مِش تا گواچی مس۔ نزور آ ٹیم کیگلیاری تون اپ سیٹ بے سہبی دوئی مس، گول اسکور کپروک آ کرسٹیانو رونالڈو نا یورپیئنز گولڈن شو ایوارڈ بھیم اٹی تما۔ لاک ڈاؤن اٹ سیری اے نا بھلو مقابلہ اس، پدریسہ نومیکو وار چمپئن مروک آ ٹیم یووینٹس نا کیگلیاری تون مون مقابل مس۔ گمان تا برعکس یووینٹس اٹ اُست ہسون والا گوازی اس پیش کرے، ہشتمیکو منٹ اٹ حریف ٹیم نا گول آن ون ڈاؤن اولیکو و ہاف نا اضافی وخت اٹ یووینٹس ءِ ارٹمیکو گول اوفتے ملا، 2-0 نا برتری اولیکو و ولدا ارٹمیکو ہاف اسکان سلیس۔ ہندا اسکور آن چیمپئز آتے اپ سیٹ بے سہب مس ہراڑان شیدائیک ہم اپ سیٹ مسر۔ کرسٹیانو رونالڈو تون اوار یووینٹس نا اسٹار گوازی گرک جوان خننگتوس، ہچ ءُگول اس کننگ کتوس۔ سیزن اٹ 30 گول تون اوار یورپیئنز گولڈن شو ایوارڈ کن فیورٹ رونالڈو سختی تے ٹی تما۔ گڈیکو ارا میچ آتیٹی کم از کم 4 گول کروئی تمک۔ ایوارڈ نا دوڑ اٹ بائرن میونخ نا روبرٹ لیونڈاسکی و لیزیو اسٹرائیکر کائرو ایموبائل نا سخت چیلنج دوئی مریک۔