سعودی تون متکن آ تعلقداری تے سوگو واپاری شریداری ٹی بدل کینہ،وزیرِ اعظم محمد شہباز شریف

اسلام آباد، وزیر اعظم محمد شہباز شریف پاکستان و سعودی عرب نا نیام اٹ ایلمی تعلقداری تیا ہیت کرسا پارینے کہ ہڑتوم آ ملک آک اسٹریٹجک شریدار ءُ، متکن آ تعلقداری تے سوگو واپاری و زرکاری شریداری ٹی بدل کینہ، مکہ مکرمہ اسیجائی دفاعی معاہدہ غان پاکستان، سعودی عرب و ترکیہ پین خُڑک بسنو، دا معاہدہ مچ آ ڈیہہ اٹی سیوت و امن نا کلہو تسنے۔ دا خیال آتا درشانی ءِ او سعودی عرب نا وزیرِ ماحولیات، دیر و کشت وکشارانجینئر عبدالرحمن بن عبدالمحسن الفضلی تون ہیت وگپ کرسا کرے‘ ہرا جمعہ نا دے پی ایم ہاؤس اٹی اوڑتون اوڑدہی کرے۔ پی ایم آفس نا میڈیا ونگ انا رداٹ وزیرِ اعظم سعودی وزیر و اونا ڈل ءِ بخیر کرسا پارے کہ ہڑتوم آ ملک آتا نیام اٹ ایلمی تعلقداری ءِ۔ او خادم الحرمین الشریفین شاہ سلمان بن عبدالعزیز آل سعود و ولی عہد شہزادہ محمد بن سلمان بن عبدالعزیز آل سعود کن نیک است خواہی نا درشانی ءِ کرسا پارے کہ سعودی عرب، ترکیہ و پاکستان نا نیام اٹ زوت آتے اٹ پک مروک مکہ اسیجائی دفاعی معاہدہ غان ہر مسٹ آ ملک آک پین خُڑک بسنوو دا معاہدہ مچ آ ڈیہہ اٹی سیوت و امن نا کلہو تسنے۔ او پارے کہ پاکستان و سعودی عرب اسٹریٹجک شریدار ءُ ہندا سوب آن ہڑتوم آ ملک آک اقتصای و کشاری بشخ آتے ٹی کمکاری ءِ پین ودفنگ آ چکار کیرتانکہ متکن آ تعلقداری تے سوگو واپاری و زرکاری شریداری ٹی بدل کننگ مرے ہراڑان ہڑتوم آ ملک آتے فائدہ مرے۔ وزیراعظم ہڑتوم آ ملک آتا نیام اٹ خاص وڑ اٹ پاکستان آن سعودی عرب ءِ کشاری گڑاتابرآمد نا بابت برجامثبت کمکار ی آ است جمی نا درشانی ءِ کرے۔ اوڑدہی ٹی پاکستان اٹی کشاری پیداوار ءِ ودفنگ کن ٹیکنالوجی، پٹ وپول و شونداری و دیر انا وسیلہ غاتا گیشتر کاریم اٹ اتنگ نا کمک اٹ کمکاری ءِ ودفنگ آ ہم گپ و تران مس۔ وزیرِ اعظم پڑو کرے کہ پاکستان نا کشاری چاہندار آتا اسہ ڈل اس زوت ریاض نا دورہ ءِ کیک ہراڑے ہڑتوم آ ملک آتا نیام اٹ دا باندات آتیا پین گپ و تران کننگک تانکہ دا شریداری نا پورو لائخی آن فائدہ ہرفنگ مرے۔ سعودی وزیر جم و جوش اٹ بخیر و مہمانداری آ وزیرِ اعظم نا منت واری ءِ ہرفے۔ اوکشت وکشار، دیر و غذائی رکھ انا بشخ آتے ٹی پاکستان تون کمکار ی ءِ پین ودفنگ نا سعودی عرب نا عزم انا درشانی ءِ کرے۔ اوڑدہی ٹی بنجائی وزیر رانا تنویر حسین، محمد اورنگزیب، عطا تارڑ، جام کمال خان، ڈاکٹر مصدق ملک، جنید انوار چوہدری، بلال اظہر کیانی، وزیرِ اعظم نا خاص کمکار طارق فاطمی و ڈاکٹر سید توقیر شاہ تون اوار ایلو بڑزکو کمامدار آک ساڑی ئسر۔