برانزنا سیبو ءِ ہلسا بیدادی، پرغ بٹ نا موکل تننگ مفک،بنجائی وزیر داخلہ

چارسدہ، بنجائی وزیرداخلہ محسن نقوی پارینے کہ پرامن برانزہر شاری نا حق ءِ، کانود برانزنا وڑ و پیم ءِ کرینے، کانود نا دنگ اٹ رہینگسا پرامن برانز آ کس اسے اعتراض اف، ملک انا امن و ایمنی و سوگوی ءِ ہچ ءُ وڑ اسے ٹی لتاڑنگ نا موکل تفنہ۔ او دا ہیت آتے جمعہ نادے آ چارسدہ ٹی فیڈرل کانسٹیبلری ٹریننگ سینٹر شب قدر نا دورہ نا وخت آ تران کرسا کرے۔ بنجائی وزیر داخلہ محسن نقوی اینٹی رائٹ ونگ انا خاص ہیلکاری مشق آتا جاچ ءِ ہلک و و کارندہ غاتا کسبی لائخی، پوسکن ہیلکاری و آپریشنل تیاری تا ستاءِ کرے، بنجائی وزیر داخلہ اینٹی رائٹ ونگ انا کارندہ غاتا جتا جتا عملی مشق آتے ہرا۔ کارندہ غاک مچی ءِ کنٹرول کننگ، حساس جاگہ غاتا رکھ، بیداد حالیت آتتون مون تننگ و امن و ایمنی ءِ برجا تخنگ نا بابت تینا کسبی لائخی تا عملی درشانی ءِ کریر۔ وزیر داخلہ محسن نقوی پارے کہ اینٹی رائٹ فورس ءِ پوسکنوڑ ہیلکاری تننگانے، امن و ایمنی نا ہر حالیت آتون مون تننگ کن فورس پورو تیار و پبی لائخی تخک۔ او پارے کہ برانزنا سیبو اٹ بیدادی، پرغ بٹ، سرکاری یا پرائیویٹ میرات آتے نسخان رسیفنگ و امن و ایمنی ءِ خراب کننگ نا ہچ کس ءِ موکل تننگ مفک۔ ریاست امن و ایمنی ءِ برجا تخنگ نا تینا زمواری ءِ پورو کیک و کانود ءِ دوٹی ہلوک زموار آتتون کانود نا رداٹ مون تننگک۔ او پارے کہ امن و ایمنی نا ساڑی حالیت آتیٹی فیڈرل کانسٹیبلری نا کڑد مچ آ ملک اٹ بھاز اہمیت تخک۔ نمے ہر وڑ انا چیلنج آتتون مون تننگ کن تیار مروئی ءِ، تینا ہیلکاری ءِ پبی وڑاٹ پورو کبو و پورو کسبی تیاری تون پڑ آ ببو۔ نمے جہانی آب انا پوسکنوڑ پروٹیکشن گیئر تننگ انگ ءِ تانکہ فیلڈ اٹ نمارکھ و آپریشنل لائخی ءِ پک کننگ مرے۔ بنجائی وزیر داخلہ محسن نقوی کل ورناتے گیس ماسک تننگ نا پارت کرسا پارے کہ نما ہیلکاری آ خاص چکار کننگانے، ہر وڑ انا ٹریننگ خواری، استخواہی و پورو کسبی جوزہ اٹ پورو کبو۔ بنجائی وزیر داخلہ ایف سی ہیڈکوارٹر اٹ گوازی تا گچین آسراتی تننگ نا پڑو ءِ کرسا پارے کہ جہانی آب انا سوئمنگ پول ہم جوڑ کننگک۔ بنجائی وزیر داخلہ بیرک آتا دورہ ءِ کرے، کارندہ غاتتون اوڑدہی کرے و اوفتا ویل آتا بابت سوج کرے۔ بنجائی وزیر داخلہ ایف سی ہیڈکوارٹر اٹ کارندہ غاتا کل واش روم تے اول سرآن جوڑ کننگ نا پارت کرے۔ بنجائی وزیر داخلہ کارندہ غاتیان سوج کرے کہ نم گدرینگوک آ دورہ اٹی لوڈشیڈنگ نا ویل انابابت ہیت کریرے داسہ حالیت امر ءِ؟ کارندہ غاک پاریر کہ داسہ لوڈشیڈنگ مفک و بے سلنگ آن بجلی تننگ انگ ءِ۔ کارندہ غاک ویل آتے ایسر کرفنگ آ بنجائی وزیر داخلہ محسن نقوی نا منت واری ءِ ہرفیر۔ بنجائی وزیر داخلہ اسہ کارندہ اسے نا لمہ نا کینسر نا درمان کن دمدستی گام گیج نا پارت ہم کرے۔ حوال اٹ پاننگا کہ ہیلکاری دوئی کروک کارندہ غاتیٹی کل صوبہ غاتتون اوار آزاد کشمیر و گلگت بلتستان ءِ نمائندگی دوئی ءِ وخت اس کہ ہیلکاری پروگرام اٹ اولیکو وار 35 زالبول کارندہ ہم اوار ءُ۔ آئی جی فیڈرل کانسٹیبلری، ڈی آئی جی ٹریننگ، ڈی او ایف سی و ایلو بڑزکو افسر آک ہم دا وخت آ ساڑی ئسر۔