دہشت گرد جلہو کون آ کارروائیک قوم انا ارادگی ءِ نزور کننگ کپسہ،وزیر اعلیٰ میر سرفراز بگٹی

وزیراعلیٰ بلوچستان میر سرفراز بگٹی کراچی ٹی پاکستان رینجرز (سندھ) انا کیمپ آ مروک آ دہشت گرد جلہو نا سخت انگا لوز آتیٹی مذمت ءِ کرسا پارینے کہ دہشت گردی نا دا لغوری آ کارروائیک قوم انا عزم ءِ ہچ وڑاٹ نزور کننگ کپسہ۔ وزیراعلیٰ جلہو اٹی شہید مروک رینجرز نا ورنا تے خراج عقیدت پیش کرسا پارے کہ وطن نا بہادر آ مار تا قربانیک مدام قوم انا پیشانی نا بینہ مریرہ۔ او شہید مروک آتا درجہ غاتا بڑزی، پد خاہوت آتے کن سگ و صبر و ٹھپی مروک آ کارندہ غاتا دمدستی و پورو دراخ جوڑی کن دعا کرے۔ میر سرفراز بگٹی پارے کہ دہشت گردی نا ناچوڑ نا چٹفنگ کن پاکستان نا سلہہ بند فوج، کانود نافذ کروک ادارہ و مچ آ قوم اسہ چِر اٹ سلوک ءُ۔ او پارے کہ بھارت نا مَخ تف دہشت گرد تپہ و اوفتا کمک کار آک تینا گندہ غا مسخت آتیٹی ہچبر سرسہب مفسہ و ریاست پورو واک اٹ دہشت گردی نا برخلاف کارروائی تے برجا تخک۔ وزیراعلیٰ بلوچستان پارے کہ شہید مروک آتا دتر اسُل زیان مفک و دہشت گردی نا ہر ڈٹ ءِ آہنی عزم‘ قومی سیوت و بھرمی پالیسی نا کمک اٹ بے سہب کننگک۔ او دا ارادہ نا دوارگی کرے کہ بلوچستان حکومت دہشت گردی نا برخلاف قومی بیانیہ، ریاستی پالیسی و سیکورٹی فورس آتا ہر وڑ اٹ مخ تفی ءِ برجا تخک۔ وزیراعلیٰ پارے کہ پاکستان نا امن، سوگوی و سلامتی ننا اولیت آتے ٹی اوارءِ و دہشت گردی نا پورو چٹفنگ اسکان دا جہد پورو واک اٹ برجا سلک۔