پی پی و اے این پی نا استیفہ غاک منظور متنو، مولانا فضل الرحمن

اسلام آباد :  پی ڈی ایم نا سروک مولانا فضل الرحمان پارینے کہ اپوزیشن نا ہڑتوم آ بھلا جماعت آک استیفہ تننگ کن تیار افس، پیپلز پارٹی و عوامی نیشنل پارٹی نا پی ڈی ایم آن استیفہ غاک منظور متنو، اپوزیشن جماعت آک کنا اسمبلی تیان سوغند ہرفپننگ نا خواست ءِ منتوس، تینے نسخانی کریر۔ بھارت تون واپار کننگ نا حق اٹی اُٹ۔ ہراتم واجپائی بس اٹ توس لاہور آ بس، ہمو وخت آ ہم اودے بخیر کریسٹ۔ ننا فوج اتون جنگ اکن بے کچ ءُ وس واک ارے،تو دا نن کن خوشی نا ہیت اسے۔ پنچ شنبے نا دے میڈیا تون ہیت و گپ کرسا مولانا فضل الرحمن پارے کہ پیپلزپارٹی پی ڈی ایم سیوت اٹی پدی بننگ نا خواہندار ءِ، ننا شڑت آتیا سجفنگ نا سوب آن ہُرے مننگ اٹی ءِ، ہراڑکن ادے وخت تننگانے۔ خوشی نا ہیت دادے کہ سیوت برجا ءِ، و عئید آن پد پی ڈی ایم نا سروک دیوان بٹنگ انگک۔ اگہ پیپلزپارٹی پی ڈی ایم اٹی پدی برسا ننا موقف ءِ امنا کے تو نن سینیٹ اٹی اونا اپوزیشن لیڈر ءِ ہم امنا کننگ کینہ۔ او پارے کہ عوامی نیشنل پارٹی ہم باپ آن وونٹ ہلنگ آ پیپلزپارٹی است اٹ کرینے، اونا سرکڑدہ غاتے اسہ زور اسے نا سوب آن سیوت آن جتا مننگ نا پڑو کروئی تمانے۔ پیپلزپارٹی کن سیوت نا درگہ غاک ملوک ءُ۔ نن وضاحت خواہسنن، اوفک ایتو تو ہیت مونی کاہک۔ پی ڈی ایم اٹی داسہ (ن) لیگ نا کماشی ٹی شہباز شریف کیک۔ عئید آن پد ولدا السی رابطہ مہم چلیفنگک۔ مولانا فضل الرحمن پارے کہ ملکی زرگزران ءِ بحال کننگ کن ملک اٹی سیاسی سوگوی بھاز المی ءِ، ساڑی پارلیمنٹ اٹی ان ہاؤس بدلی نا ہچ ءُ آپشن اس اف۔ گچین کاری اصلاحات کن ہندن ءُ قومی حکومت اس ٹہیفنگ کن کسر آوار مننگ کیک ہراٹی اپوزیشن نا کچ زیات مرے۔(آن لائن)