نیپال و تبت نا سیم آ نوکاپ و لینڈ سلائڈنگ،165 بندغ زوال

کھٹمنڈو،بیجنگ، نیپال و تبت نا سیم آ بھسکاری کروک نوکاپ و لینڈ سلائیڈنگ نا سوب آن 165 بندغ زوال و 800 درملکی تتون اوار کم و ود 1500 بندغ گم مسنو۔ رائٹرز نا رداٹ کمامدارآک پارینو کہ ہمالیہ نا مشی آ علاقہ ٹی مش و خل تا اسہ بھلو کرود اس دریاب اٹی تمنگ آن پد اناگت بروک آ نوکاپ چندی شار، خلق، کسر و پول آتے بھاز نسخان تس، نیپال اٹ 826 بندغ گم ءُ، ہرافتے ٹی کم و ود 500 درملکی سیلانی اوار ءُ۔ گم مروک درملکی تیٹی بھارت نا 177، امریکہ نا 63، آسٹریلیا نا 34، برطانیہ نا 33 و کینیڈا نا 25 شاری اوار ءُ۔ چینی علاقہ تبت نا گیئرونگ کاؤنٹی ٹی 558 بندغ گم ءُ، ہرافتے ٹی 260 درملکی شاری اوار ءُ، وخت اس کہ چین اٹ زوال مروک آتا کچ 3 پاننگانے۔ نیپال اٹ 5 ہزار آن زیات فوج و پولیس کارندہ کمکی کاریم تیٹی بشخ ہلنگ ءُ۔ ہیلی کاپٹر تا کمک اٹ زہمی علاقہ غاتیٹی تمبو، کنشت ایلو المی کمکی گڑا سرکننگ انگ ءِ، وخت اس کہ ریسکیو ٹیمک پنچ شنبے نا دے آ125 بندغ ءِ بچفیر، ہرافتے ٹی 20 درملکی ہم اوار ءُ۔ زہمی تیٹی کیلاش مانسروَر نا یاترا غا ہنوک آ چندی مراد وند آک ہم اوار ءُ۔ ہمالیائی سیل و سواتی کمپنی نا چیف ایگزیکٹو ساگر پانڈے نا رداٹ کمپنی تون اوار یاترا کن ہنوک 15 بھارتی نژاد آسٹریلوی شاری گم ءُ۔ او پارے کہ ہوائی جاچ انا وخت آ زہمی علاقہ غاتیٹی انسانی آبادی و تعمیرات نا گیشتر بشخ بھس خننگارہ۔ نیپال نا کمامدار آتا رداٹ بنائی وڑاٹ گمان کننگاسس کہ علاقہ ٹی زمی جمب نا سوب آن گلیشیئر نا شیفکو بشخ انا پِننگ آن نوکاپ بس، ولے امریکی جیولوجیکل سروے پیدوار کرے کہ زمی جمب نا سرجز اصل اٹ گلیشیئر نا خل و برف انا پننگ و اوکان پد ڈیمبری نا زوراناسوب آن ودی مسوسس۔ آسٹریلوی وزیراعظم انتھونی البانیز پارے کہ بھسکاری نا بابت معلومداری داسکان کچ اٹی ءِ۔ امریکی محکمہ خارجہ آفت تون مون تننگ کن اسہ چاہندار سلاہکار اس راہی کننگ و 5 لکھ ڈالر نا کمک فراوان کننگ نا پڑو کرینے، وخت اس کہ کینیڈا ہم حالیت آ پورو نظر تخنگ نا پڑو کرینے۔ اقوام متحدہ نا سیکرٹری جنرل انتونیو گوتریش نا رداٹ اقوام متحدہ نا ٹیمک و کمک کروک شریدارآک زہمی نیپالی آبادی تا کمک کن کمی گڑا و کارندہ راہی کننگ ءُ۔