اللہ و رسولؐ نا اطاعت و توحید خلاسی نا اسٹ انگا کسر،خطبہ حج

میدان عرفات : 1444 ہجری نا خطیب ڈاکٹر شیخ یوسف بن محمد پارینے کہ تفرقہ و خار تالان کننگ گناہ ءِ، شریعت ہوکا کننگ آن تورینے، ہنداسوب ءِ کہ اللہ فاسق نا خبر نا جاست وپاست نا پرمان کرینے، شریعت آن مر مروک آک تینا اصلاح ءِ کیر و دین نا کنڈ آ پدی بریر، غٹ مسلمان تے تین پہ تینی سیوت، مہرومریبت اٹ رہینگ انگ و تفرقہ غان پاناد کننگ نا پرمان کننگانے، نن تینا اولیاد آتے ہم بایدے اجتماعیت نا سبخ ءِ خوانفن، باطل نا کل جماعت آتا مون اٹ حق اکن تنیا سلنگ زیات گچین ءِ، ہرمومن ایلو مومن کن اسہ بھلو ماڑی اسے آنبار ءِ ہنداسوب آن ہرمسلمان ءِ مرے کہ دا ماڑی نا تمبہ جوڑ مرسا اودے سوگو کے، مچ آ عالم اسلام اسہ خاہوت آنبار ءِ اگہ خاہوت سہی مرے تو مچ آراج سہی مریک، رسول اللہ صلی اللہ علیہ و آلہ وسلم خاتم النبیین ءِ، اللہ و اونا رسول صلی اللہ علیہ و آلہ وسلم نا اطاعت و عقیدہ توحید آ کاربند سلنگ اٹ ننا نجات ءِ۔ سے شنبے نادے آ مسجد نمرہ ٹی حج 1444ھ نا خطبہ ءِ ترسا اوپارے کہ ننا غٹ انا اوار تولنگ اجرنا سوب ءِ، تفرقہ شاغنگ و خارتالان کننگ گناہ اسے، نبی پاک صلی اللہ علیہ و آلہ وسلم ننا است آتے اسٹ کرے، نبی پاک صلی اللہ علیہ و آلہ وسلم اللہ نا رسول نا وڑ بس و اللہ نا کلہو ءِ ننے اسکان سرکرے کہ اللہ آن بیدس کس اس عبادت کڑزپک، غٹ مسلمانک اللہ غان خُلِر، شریعت نا پاسداری ءِ کیر، اللہ نا حد آتا رکھ ءِ کیر ہرافک اللہ نا حد آتا رکھ ءِ کیرہ اوفتے کن اجرعظیم ءِ۔ اوپارے کہ اللہ نا پرمان ءِ کہ اللہ آن بیدس کس اسے نا عبادت ءِ کننگپ، توحید آ کاربند سلوک آتیکن نجات ءِ۔ اوپارے کہ اللہ بھاز انگا تے ہدایت تس و بھاز انگاتے ہدایت آن مرکرے، دروغ تڑوک آتا خراب ءُ انجام اس مس، نن اللہ نا کنڈا ہنوئی ءِ، رسالت نا گواہی ءِ اللہ ننکن خاص کرینے، رسول اللہ صلی اللہ علیہ و آلہ وسلم خاتم النبیین ءِ، نن غٹ اللہ نا اطاعت ءِ کین، اللہ آن بیدس کس اسے نا عبادت ءِ کننگپ۔ اوپاریکہ صاحب ثروت مسلمان تینا ایلومسلمان ایلم تا کمک ءِ کے و مدام خیر انا کاریم تیٹی تینا بشخ ءِ شاغے، اللہ نمازءِ قائم کننگ، روچہ تخنگ، و و صاحب استطاعت مخلوق ءِ بیت اللہ نا حج کننگ نا پرمان کرینے۔ اوپارے کہ اسلام دادے کہ نن اللہ و رسول اللہ صلی اللہ علیہ و آلہ وسلم نا گواہی ءِ ایتن ہنداوڑ اللہ فرشتہ، کتاب و قیامت نا دے آ ایمان اتنگ ہم فرض ءِ۔ اوپارے کہ اللہ ہر مسلمان آ اونا ایلو ایلم نامال، جان و عزت ءِ حرام کرینے، ڈغار و آسمان ءِ ودی کننگ اللہ نا نشانیک ءُ۔ اوپارے کہ ننے مہرومریبت و الفت اٹ رہینگ انگ و تفرقہ غان باز رہینگ نا پرمان ءِ، ننے غٹ ءِ اللہ نا چِھٹ ءِ سوگوی اٹ توننگ نا پرمان کننگانے۔ اوپارے کہ اللہ غالب و حکیم ءِ ہمو ننا است آتے گنڈانے، تفرقہ شاغوک آتے اللہ قیامت نا دے آ اوفتا ڈوہ انا پاہک۔ سرکاردوعالم صلی اللہ علیہ و آلہ وسلم نا فرمان ءِ کہ عربی اسے عجمی و عجمی اسے عربی آ ہچ ءُ فوقیت اس اف، مچ آ مسلمان قوم جسد واحد آنبار ءُ، مومن مومن کن اسہ بھلوماڑی اسے آنبار ءِ ہر مسلمان داماڑی نا تمبہ ءِ سوگوکیک۔ اودعاکرے کہ اللہ تعالیٰ وقوف عرفہ نادے ننا غٹ انا دعاتے قبول کے، عالم اسلام ءِ سیوت اٹ رہینگ انگ نا توفیق عطاکے۔ اوسعودی فرمانرواخادم حرمین الشریفین شاہ سلمان بن عبدالعزیز و سعودی وزیراعظم و ولی عہد محمد بن سلمان نا کنڈآن حاجی تیکن کروک آ کوشست و خذمت آتیا خراج تحسین پیش کرے و دعاکرے کہ اللہ اوفتا خیر انا کاریم تیٹی پین برکت عطاکے و اوفتے کن آسانی ود ی کے۔ ڈاکٹر شیخ یوسف بن محمد دعاکرے کہ اللہ ننا غٹ انا بخشش ءِ کے و حاجی تا حج ءِ قبول کے و ننا اُراتیٹی خیروبرکت نازل کے۔

(اے پی پی)