مسنکو تا ہیل کرسا عملی زند انا کنڈ آ بننگ ستا کڑزوک ءُ ہیت اسے، کمانڈنٹ ایف سی پنجگور رائفلز

وومن اسکل ڈویلپمنٹ سینٹر خدابادان اٹی اولیکو بیچ انا پورو مننگ آ ہیلکاری دوئی کروک مسن تیٹی سَند و انعام آتا بشخ و پانٹ نا بابت اسہ شرفدار ءُ دود اس اڈ ہلک۔ دود اٹی جتا جتا بشخ آتیٹی فارغ التحصیل مسن تیٹی سند و نغد انعام و گچین مروک مسن تیٹی لیپ ٹاپ بشخ وپانٹ کننگا‘ دود انا خاص انگا مہمان کمانڈنٹ ایف سی پنجگور رائفلز میجر جنرل ظفر اقبال ئس و ایلو مہمان تے ٹی ڈپٹی کمشنر پنجگور جہانزیب بلوچ، علاقہ نا متبر، نیاڑی و مسن تا اسہ بھلو کچ اس بشخ ہلک۔ دا وخت آ سردار سعود احمد ساسولی، حاجی امیر جان، عبدالستار، عبدالحمید، ظہیر احمد، حاجی محمد اقبال و ایلو ہندی متبر آک ساڑی ئسر۔ اسکل ڈویلپمنٹ سینٹر نا بشخ کشیدہ کاری، آرٹ، دستکاری، آئی ٹی، حفظِ قرآن مجید و جتا جتا بشخ آتتون تعلقدار مسن تا اولیکو بیچ انا فارغ مننگ نا بابت مسن تیٹی سند بشخ وپانٹ کننگا‘ مسنک دود اٹی نعت، حمد، ٹیبلو و جتا جتا مضمون تیا تران کرسا تینا خیال آتا درشانی ءِ کریر۔ ڈپٹی کمشنر پنجگور جہانزیب بلوچ تران کرسا پارے کہ دا ادارہ ٹی اسہ شرفدار ءُ دود اسے ٹی اوار مرسا کنے بے کچ خوشی مننگ اٹی ءِ کہ دا ادارہ ٹی پترینگ تون محسوس مس کہ واقعی دا اسہ ادارہ اسے و مسن تا تران و ایلو نصابی و غیر نصابی سرجز آتیٹی بشخ ہلنگ آن د است بڈی مس کہ دا جاگہ نا مسنک بھاز ہشار و پدریسہ جہد آ پت تخرہ۔ دود انا خاص انگا مہمان کمانڈنٹ ایف سی پنجگور رائفلز میجر جنرل ظفر اقبال پارے کہ اینو نا دا دود اٹی مسن تا اولیکو بیچ انا فارغ مننگ آن ای بھاز خوش مسٹ کہ دا ادارہ غان، ہندا علاقہ غان تعلقدار مسنک ہیل کرسا اسہ عملی زند اسے نا کنڈ آ ہننگ اٹی ءُ و او تیے زرگزرانی وڑ اٹ تینا ہیل کروک ہنر آن جوان جوڑ کننگ کیرہ۔ او پارے دا مسنک ہیل کرسا داکان کارہ و تینا ہنر آن تینا زند ءِ زرگزرانی وڑ اٹ جوان و سوگو جوڑ کننگ کیرہ۔ پنجگور (نامہ نگار)