کوشست کینہ کہ لاک ڈاؤن نا کنڈ آ ہنپن، فواد چوہدری

اسلا م آباد (آن لائن) بنجائی حوالکاری و شینکاری وزیر فو اد چوہدری پارینے کہ کوشست کینہ کہ لاک ڈاؤن نا کنڈ آ ہنپن، و عئیدآ 5 چھٹی تننگ انگ ءِ۔ تدوک آ دے وزیر اعظم نا کماشی ٹی بنجائی کابینہ نا دیوان آن پد میڈیا ءِ بریفنگ ترسا فواد چوہدری پارے کہ حکومت داخس سنجیدہ ءِ کہ نن خیبرپختونخوا ٹی تینا وزیر نا برخلاف ہم ایف آئی آر کرفین، دا وخت آ 5 ہزار زہمی نا حالیت نازرک ءِ،دا 20، 22 کروڑ الس نا ملک ءِ داڑے ہر کاریم لٹ انا زور آ کرفنگ مفک۔ تینٹ ہم عقل کروئی تمک، دا ننا زند انا معاملہ ءِ۔ او پارے کہ جانجوڑی نا بشخ اکن 500 میٹرک ٹن آکسیجن ہننگ ءِ، پاکستان اٹ کم و وَد 20 لکھ بندغ ویکسین خلفینو، کابینہ دیوان ءِ کورونا نا حالیت نا بابت معلومدار کننگا۔ کورونا نا بابت السی آگہی کن میڈیا نا کڑد است بڈی نا سوب ءِ۔ دا وخت آ کورونا غان 5 ہزار زہمی تا حالیت نازرک ءِ، داکان مست پیک 3400 ئس، یعنی 3400 ناجوڑ انتہائی نگہداشت اٹ ہناسر، داسہ 5 ہزار بندغ مسنو۔ او پارے کہ نن اسہ سال اٹی ہفت ہزار بیڈ انا ودکی کرین، ہرافتیٹی آکسیجن و وینٹی لیٹربیڈ ہم اوار ارے، اگہ دا متوسہ تو ننا حالیت بھاز آنبار مسکہ۔ نن اسہ سال اسے ٹی تینا لائخی تے دوکچ کرین۔ اگہ دن کتونہ تو اینو آکسیجن نا حالیت ہم ننا دو آن پیش تماکہ۔ آکسیجن نا پیداوار نا بابت او پارے کہ جون 2020ء اٹی 484 میٹرک ٹن ہڑدے جوڑ کننگ ئسنہ، و داسہ 792 میٹرک ٹن جوڑ مننگ اٹی ءِ، و 308 میٹرک ٹن نا ودکی مسنے، ہرانا سوب آن داسہ آکسیجن نا تنکی ودی متنے۔ جانجوڑی نا بشخ اٹی 500 میٹرک ٹن آکسیجن ہننگ اٹی ءِ، او پارے کہ دا وخت آ دا آکسیجن نازرک حالیت والا ناجوڑ آتے کن گنج اسے ءُ، ولے نن 90 درسد اسکان سر مسنن، و ننا مسہ آپشن ءُ، اسٹ صنعت آتیان ہلیس جانجوڑی نا بشخ ءِ تننگر، ولدا چین و ایران آن آکسیجن درآمد کننگ نا ہیت مننگ اٹی ءِ۔ پاکستان اٹی تنکی تو ارے ولے ہڑدڑ اف، و حالیت آک ہرا وڑ مونی ہننگ اٹی ءُ، و وڑک ہندن مسر تو ننے ویل آک مون ایترہ۔ او پارے کہ وزیراعظم نا کماشی ٹی مروک این سی او سی نا تدوک آ دیوان اٹ آرمی چیف و ایلو اسٹیک ہولڈر آک ہم ساڑی ئسر۔ ہراٹی وزیراعظم نا کنڈ آن پارت کننگاسس کہ ننے پورو لاک ڈاؤن کروئی تما تو گڑا ننے سنبرینگوئی تمک، کہ گرج انا گڑا تا فراوانی زہمی مف۔ او پارے کہ خیبرپختونخوا نا حکومت مردان اٹی پورو لاک ڈٓؤن کرینے، ہراڑے کووڈ نا کچ 40 درسَد نا خڑک آ سر مسنے، خڑک انا شاری تے بھلو گڑتی اس مون تروک ءِ۔ ہندا سوب آن حکومت مردان اٹی پورو لاک ڈاؤن کرینے، کوشست کینہ کہ لاک ڈاؤن نا کنڈ آ ہنوئی تمپ، دا وار عئید آ 5 چھٹی کننگ انگ ءِ، ہرا یخین اٹ بھاز تو اریر، ولے داڑان فائدہ مریک۔