لیفٹیننٹ جنرل ندیم احمد انجم ڈی جی آئی ایس آئی،نوٹیفکیشن جاری

اسلام آباد (آن لائن) لیفٹیننٹ جنرل ندیم احمد انجم ءِ ڈی جی آئی ایس آئی تعینات کننگا و دا رد اٹ نوٹیفکیشن ہم جاری کننگانے‘ وزیراعظم عمران خان پوسکن آ ڈی جی آئی ایس آئی نا تقرری نا منظوری ءِ تس‘ وزیراعظم عمران خان سمری نا پیرا6 اٹ افسر آتا پینل آن لیفٹیننٹ جنرل ندیم احمد انجم ءِ پن کرے۔ وزیراعظم نادفتر آن جاری کروک اعلامیہ نا رد اٹ وزیراعظم عمران خان سَے شنبے نادے آرمی چیف جنرل قمر جاوید باجوہ تون اوڑدہی کرے‘ ہراٹی پوسکن آ ڈی جی آئی ایس آئی نا تقرری نا عمل آ ہیت وگپ کننگا‘ دا اوڑدہی آئی ایس آئی ٹی کمانڈ نا بدلی و پوسکن آ ڈی جی آئی ایس آئی نا گچین کننگ ناببت وزیراعظم و آرمی چیف نا نیام اٹ برجاسلابتی عمل نا بشخ اس ئس۔ وزیراعظم آفس نا رد اٹ وزارت دفاع ناکنڈآن وزیراعظم عمران خان ءِ افسر آتا پن تا سمری ءِ راہی کننگا ہرافتیا سجفنگا۔ وزیراعظم سمری ٹی ڈی جی آئی ایس آئی نا عہد کن سلاہی غٹ اومتیدار آتا انٹرویو ءِ ہلک‘ وزیراعظم عمران خان و آرمی چیف نا نیام اٹ سلابت نا گڈیکو دور مس‘ جم سلابت آن پد لیفٹیننٹ جنرل ندیم انجم ءِ پوسکن آ ڈی جی آئی ایس آئی پک کننگ نا فیصلہ مس۔وزیراعظم عمران خان لیفٹیننٹ جنرل احمد انجم نا بطور ڈی جی آئی ایس آئی تقرری نا نوٹیفکیشن ءِ جاری کرینے‘ وزیراعظم نا پرنسپل سیکرٹری اعظم خان نا دستخط آن نوٹیفکیشن جاری مس‘ نوٹیفکیشن نا اطلاق 20 نومبر 2021ء آن مریک وخت اس کہ سبکدوش مروک لیفٹیننٹ جنرل فیض حمید 19 نومبر 2021ء اسکان ڈی جی آئی ایس آئی نا وڑ کاریم کرسا کیک۔ 6 اکتوبر آ پاک فوج انا شعبہ تعلقات عامہ (آئی ایس پی آر) نا رد اٹ لیفٹیننٹ جنرل ندیم انجم ءِ انٹرسروسز انٹیلی جنس (آئی ایس آئی) ناپوسکن آ ڈائریکٹر جنرل (ڈی جی) تعینات کننگاسس۔ لیفٹیننٹ جنرل ندیم انجم پنجاب رجمنٹ نا لائٹ اینٹی ٹینک بٹالین اٹ کمیشن ہلک‘ لیفٹیننٹ جنرل ندیم انجم کمانڈ، اسٹاف و انسٹرکچرل عہدہ غاتیا مسنے‘ او کمبائنڈ آرمرز سینٹر برطانیہ غان گریجویشن کرے‘ لیفٹیننٹ جنرل ندیم انجم کنگز کالج لندن و این ڈی یو آن ماسٹر نا ڈگری ہلک‘ پوسکن آ ڈی جی آئی ایس آئی ءِ روایتی خلیس تتون مون تننگ نا بھاز آزموندہ ارے۔ لیفٹیننٹ جنرل ندیم انجم دیکی سیم‘ لائن آف کنٹرول (ایل او سی) و بلوچستان اٹ کمانڈ کرینے او سویلی وزیرستان ایجنسی ٹی انفنٹری بریگیڈ نا کمانڈ ءِ کرینے‘۔ لیفٹیننٹ جنرل ندیم انجم آپریشن ضرب عضب نا وخت آ ہمو وخت انا قبائلی علاقہ کْرم ایجنسی و خیبرپختونخوا نا ضلع ہنگو ٹی انفنٹری بریگیڈ نا کمانڈ ءِ کرینے‘ او ردالفساد نا وخت آ آئی جی ایف سی بلوچستان ہم مس۔ لیفٹیننٹ جنرل ندیم انجم ڈی جی آئی ایس آئی جوڑ مننگ آن مست کور کمانڈر کراچی تعینات ئس‘ اودے باسکٹ بال و کرکٹ نا گوازی دوست ءِ او پی ایم اے، اسٹاف کالج و این ڈی یو ٹی انسٹرکٹر ہم مسنے۔ لیفٹیننٹ جنرل ندیم انجم کمانڈ اینڈ اسٹاف کالج کوئٹہ ٹی کمانڈنٹ نا وڑ اٹ خذمت کرینے‘ لیفٹیننٹ جنرل ندیم انجم کراچی کور نا چیف آف اسٹاف ہم مسنے۔