چک وتاڑتے چٹفنگ کن مذاکرات وسفارتکاری ءِ اولیت تننگے،محمد شہباز شریف

نیویارک، وزیراعظم محمد شہباز شریف کثیر الجہتی نظام کن پاکستان نا پکاعزم و جہانی امن و شونداری نا مون آ دننگ اٹ اقوام متحدہ نا مرکزی کڑد ءِ تالان کرسا اونا منشور نا مسخت و اصول آتیان پاکستان نا سوگو وابستگی نا درشانی و علاقائی بے چیٹی نا چٹفنگ کن گپ وتران و سفارت کاری نا اہمیت آ زور شاغانے۔ جمعہ نادے آ پی ایم آفس نا میڈیا ونگ آن جاری بیان نا رداٹ وزیراعظم محمد شہباز شریف نا اقوام متحدہ نا جنرل اسمبلی نا 81 می دیوان نا وخت آ یو این سیکرٹری جنرل انتونیو گوتریش تون اوڑدہی مس، ہرا ٹی او کثیر الجہتی نظام کن پاکستان نا پکاعزم و جہانی امن و شونداری نا مون آ دننگ اٹ اقوام متحدہ نا مرکزی کڑد انا اہمیت ءِ تالان کرسا اونا منشور نا مسخت و اصول آتون پاکستان نا سوگو وابستگی نا درشانی ءِ کرے۔ او سیکرٹری جنرل انتونیو گوتریش نا سرکڑدہ ئی نا ستاءِ کرسا انسانیت نا گچینی کن اقوام متحدہ نا غٹ بشخ آتیٹی یو این منشور نا پاسداری نا بابت اونا اصولی کڑد ءِ خراجِ تحسین پیش کرے۔ ہڑتوم آ راہشونک دے ٹک نیامی نا حالیت آتون اوار اہم علاقائی و جہانی امور آ گپ وتران کریر۔ وزیراعظم علاقائی بے چیٹی نا ایسری کن گپ وتران و سفارت کاری نا اہمیت آ زور شاغسا ڈیہہ اٹی امن و سوگوی نا مون آ دننگ کن پاکستان نا مخ تفی نا درشانی ءِ کرے۔ او فلسطینی الس نا حقِ خودارادیت و آجو ریاست جوڑ کننگ نا حق اکن ہم پاکستان نا مخ تفی نا درشانی ءِ کرے۔ وزیراعظم سیکرٹری جنرل ءِ اسلاموفوبیا نا ودوک آ رجحان، خاص کر پاکستان نا خڑکی ہمسایہ ڈیہہ اٹی اونا ودوک آ واقعہ غاتیان معلومدار کرسا دا رجحان نا توننگ کن گچین جہانی گام گیج آتا گرج آ زور شاغا۔ ہڑتوم آ راہشونک اوغانستان نا حالیت و اوغان ڈغار آن مروک آ دہشت گردی ٹی مروک آ تشویشناک ودکی آ ہم گپ وتران کریر۔ سیکرٹری جنرل انتونیو گوتریش اقوام متحدہ ٹی پاکستان نا قائدانہ کڑد و گچین توار، جہانی امن و سلامتی کن خذمت، خاص کر جھیڑہ نا پرامن ایسری و ڈیہہ اٹی پائیدار امن و سوگوی کن پاکستان نا اہم سفارتی و ثالثی کوشست آتا ستاءِ کرے۔ او دہشت گردی نا برخلاف جنگ اٹ پاکستان نا کڑد و دا بابت تروک آ قربانی تا ہم ستاءِ کرے۔داکان بیدس وزیراعظم محمد شہباز شریف پارینے کہ اقوام متحدہ نا سیکرٹری جنرل انتونیو گوتریس تون اوڑدہی نا وخت آ ڈیہہ و دنیا ءِ مون تروک بھلا چیلنج آتا بارواٹ پاش گپ وتران مس، فلسطینی الس نا حقِ خود ارادیت نا غیرمتزلزل مخ تفی نا درشانی ءِ کرسا اوفتے تون اوغان ڈغار آن دہشت گردی نا ودوک آ خطرہ، ڈیہہ و دنیا ٹی جھیڑہ خاص کر دے ٹک نیامی ٹی امن نا بحالی نا بارواٹ ہم گپ وتران مس۔ جمعہ نادے آ ایکس آ تینا کلہو اٹی وزیراعظم محمد شہباز شریف پارے کہ ہروارآنبار اقوام متحدہ نا سیکرٹری جنرل انتونیو گوتریس تون اوڑدہی آ خوشی مس، ہرافتا اقوام متحدہ نا چارٹر و امن نا مشن کن مستقل مزاجی ءِ مدام قدر انا نظر اٹ ہرانے۔ وزیراعظم پارے کہ اوڑدہی نا وخت آ ڈیہہ و دنیا ءِ مون تروک سنجیدہ چیلنج آتا بارواٹ پاش گپ وتران مس و جھیڑہ غاتا ایسری، خاص کر دے ٹک نیامی ٹی امن نا بحالی کن گپ وتران و سفارتکاری ءِ برجاہ تخنگ نا پاکستان نا عزم انا درشانی ءِ کرے۔ وزیراعظم پارے کہ او فلسطینی الس نا حقِ خود ارادیت نا حق انا غیرمتزلزل مخ تفی نا درشانی ءِ کرے۔ و ودوک آ اسلاموفوبیا غا گڑتی آ ہم شرہ مس، وخت اس کہ اوغان ڈغار آن دہشت گردی نا خطرہ غاتا بارواٹ ہم ہیت مس۔ وزیراعظم پارے کہ او اقوام متحدہ نا سیکرٹری جنرل نا کنڈ آن جہانی امن و سلامتی، دہشت گردی نا برخلاف جنگ اٹ پاکستان نا قربانی، ڈیہہ اٹی پائیدار امن و گپ وتران نا مون آ دننگ کن ساڑی آکوشست آتیاپاکستان نا کڑد انا ستاءِ کننگ آ اونا منت واری ءِ ہرفے۔