قدوس بزنجو ءِ وزیر اعلیٰ جوڑ کننگ نا فیصلہ،اسپیکر شپ آن استیفہ تس

کوئٹہ (آن لائن/ اے پی پی) وزیراعلی بلوچستان جام کمال نا استیفہ نا منظوری آن پد کابینہ تحلیل مس‘ میر عبدالقدوس بزنجو ءِ پوسکن آ وزیراعلی جوڑ کننگ نافیصلہ کننگا۔ وزیراعلیٰ جام کمال نا استیفہ نا منظوری آن پد چیف سیکرٹری بلوچستان صوبائی کابینہ ءِ تحلیل کننگ نا نوٹیفکیشن ءِ جاری کرینے‘ ایلو کنڈ آ اسپیکر بلوچستان اسمبلی میر عبدالقدوس بزنجو تینا عہدہ غان استیفہ تسنے۔ حوالی نا رد اٹ بی اے پی نا ناراض باسک آک میر عبدالقدوس بزنجو ءِ پوسکن آ وزیراعلی و جان جمالی ءِ پوسکن آ اسپیکر گچین کننگ نا فیصلہ کرینو‘ بلوچستان اسمبلی نا اسپیکر عبدالقدوس بزنجو اسمبلی دیوان آن پد استیفہ تس‘ بلوچستان عوامی پارٹی نا باسک جان جمالی ءِ پوسکن آ اسپیکر گچین کننگک‘ بلوچستان نا پوسکن آ وزیراعلی ءِ گچین کننگ کن پوسکن دیوان بٹنگک‘ ہراٹی عبدالقدوس بزنجو ءِ پوسکن آ وزیراعلیٰ گچین کننگکک‘ یات سلے کہ مسکوہی وزیراعلی بلوچستان جام کمال تینا برخلاف بے پتی نا تحریک اتنگ و اپوزیشن و ناراض باسک آتا کنڈآن نمبر پورو مننگ آ استیفہ تسوسس۔ہندن دوشنبے نادے آ بلوچستان اسمبلی نا دیوان اسپیکر نا کماشی ٹی اڈ ہلک ہراٹی جام کمال خان نا استیفہ غان پد بے پتی تحریک ءِ پدی ہلنگا۔ دیوان آن پد اسپیکر بلوچستان اسمبلی میر عبدالقدوس بزنجو تینا عہدہ غان استیفہ تس۔ بلوچستان عوامی پارٹی نا ترجمان سردارعبدالرحمن کھیتران پارینے کہ پوسکن آ قائد ایوان کن سنگت آک میرعبدالقدوس بزنجو آ امنا کرینو‘ کل سنگت آک اواری اٹ بروک آ اسہ اِرا دے اٹ پوسکن آحکومت ءِ جوڑ کینہ‘ اپوزیشن ہم نن تون اوار مریک‘ مستین نا حکومت اٹ اوار سیوتی تتون اوار کل انا اواری اٹ کاریم کینہ۔ بلوچستان نا الس ءِ گچین ءُ وزیراعلی اس ایتنہ ہرانا لخ سیخ آنبار مفک و روڈ آتیا کمشنرو ڈپٹی کمشنر آتا بھلو فوٹو تا چرجوئی ءِ چٹفسا پوسکن آ سہب انا بناءِ کینہ۔ دا خیال آتا درشانی ءِ او بلوچستان اسمبلی نا دیوان آن پد میڈیا تون ہیت وگپ کرسا کرے۔ سردارعبدالرحمن کھیتران پارے کہ کل سنگت آک اواری اٹ اسہ ارا دے اٹ پوسکن آ حکومت ءِ جوڑ کینہ اپوزیشن نن تون اوار مریک۔ سردار عبدالرحمان کھیتران پارے کہ اسپیکر بلوچستان اسمبلی میرعبدالقدوس بزنجو ہم اسپیکرشپ آن استیفہ ترسا گورنر آ راہی کرینے‘ نن جمہوری نظام نا رد اٹ مونی کانہ‘ دا وخت آ پوسکن آ قائد ایوان کن میرعبدالقدوس بزنجو نا پن آ امنائی مسنے داٹی جمعیت علماء اسلام، بلوچستان نیشنل پارٹی، پشتونخواملی عوامی پارٹی، بی این پی(عوامی)، پاکستان تحریک انصاف، پاکستان نیشنل پارٹی وایلو سیوتیک اوار ءُ۔ او پارے کہ نن ڈل اس ٹہفینن ہرا مست ان سیوتی اے این پی‘ ایچ ڈی پی، پی ٹی آئی وجے ڈبلیو پی تون اوڑدہی کیک و اوفتے پوسکن آ حکومت اٹ اوار مننگ نا سلہ خلیک۔صوبائی اسمبلی نا باسک و بلوچستان عوامی پارٹی نا ترجمان سردار عبدالرحمان کھیتران پارینے کہ جام کمال نا منت وار اُن کہ او قائد ایوان نا منصب آن استیفہ ترسا پارٹی ءِ بچفے۔ نن غٹ جماعت آتون اواری اٹ چلینگنہ، اپوزیشن ننتون اوار مریک، کوئٹہ ٹی صحافی تا اسہ ڈل اسے تون گپ وتران کرسا بلوچستان اسمبلی نا باسک عبدالرحمان کھیتران پارے کہ جام کمال داسہ ہم ننا بھلا ءِ نن اوڑتون سلابت ءِ برجاتخنہ۔ اوپارے کہ نن زوت اسہ پوسکن ءُ وڑاسے نا حکومت اس جوڑ کینہ، بلوچستان اسمبلی ٹی پوسکن ءُ اسپیکر اس کننگک۔ بلوچستان عوامی پارٹی نا ترجمان نا پاننگ ئس کہ بلوچستان اٹی پوسکن ءُ وزیراعلیٰ اس ہندن ءُ اتینہ ہرا الس نا دسترس اٹ مریک، نن اسہ سلابتی ءُ کمیٹی اس جوڑ کرینن ہرا اپوزیشن تون اوار غٹ جماعت و اسمبلی نا باسک آتون رابطہ کیک، نن غٹ جماعت آتون اواری اٹ کانہ۔ سردار عبدالرحمان کھیتران مستی پارے کہ منہ دے اسکان پوسکن آ وزیراعلیٰ نا گچین کاری نا عمل ءِ پورو کننگک۔