نہاد آتیٹی ودکی نا مون ءِ بروک آ منہ ہفتہ ٹی توننگک،مفتاح اسماعیل

اسلام آباد : بنجائی وزیر خزانہ مفتاح اسماعیل پارینے کہ زرگزران ءِ شونداری ناکسر آ روان کرسا بروک آ منہ ہفتہ ٹی نہاد آتے ٹی ودکی نا مون ءِ توننگک و بروک آہفتہ روپئی آ زور ءِ ہم کم کننگک‘ مئی وجون اٹ ریکارڈ ترسیلات مس وخت اس کہ ایف بی آر ہم ہدف آتے دوئی کرینے۔ اسلام آباد اٹ میڈیا تون ہیت وگپ کرسا وزیر خزانہ مفتاح اسماعیل پارے کہ گچین ءُ فیصلہ کرسا دا مالی سال انا پک کروک زرگزرانی ہدف آتے دوئی کننگک‘ دیکی ٹی ودوک آ کساد بازاری نا سوب آن برآمد آتے ٹی ودکی اسہ بھلو چیلنج اس مننگ کیک و دا رد اٹ ننے تینا برآمد آتے ودفنگ کن پین کوشست کروئی مریک‘ زرگزرانی نااہم انگا برآمدی بشخ ءِ سیبو تننگ کن صنعتی فیڈر آتیا ہچ ءُ لوڈشیڈنگ اس مفننگ ءِ‘ وزیرخزانہ منہ بندغ ناکنڈآن ودی کروک دا تاثر ءِ مسترد کرے کہ ہندا منہ تُو اٹ ملک انا ترسیلات زر، برآمد و خراج ہلنگ اٹ کمتی بسنے۔ مفتاح اسمٰعیل نشاندہی کرے کہ مئی و جون اٹ ریکارڈ ترسیلات مس وخت اس کہ ایف بی آر ہم تینا ہدف آتے دوئی کرینے حکومت دا مالی سال اکن محصولات اٹ 35 درسَد ودکی نا ہدف پک کرینے۔ وزیرخزانہ پارے کہ ایف بی آر 7 ہزار 500 ارب روپئی جمع کیک وخت اس کہ 800 ارب روپئی لیوی نا وڑ اٹ مچ مریک و حکومت زرگزران ءِ درست کنڈآ دننگ کن زرگزران نا پیداواری بشخ اتون اور کشت وکشار‘ صنعت و انفارمیشن ٹیکنالوجی ءِ کمک فراوان کننگ اٹی ءِ نئے بیرہ دا بلکہ بج آتیا ہم خراج ءِ چٹفنگانے و انفارمیشن ٹیکنالوجی نا برآمد آتیا خراج ءِ اسہ درسَد آن کم کرسا 0.25 درسَد کننگانے۔ روپئی نا قدر اٹ کمتی نابابت ارفوک سوج آ وزیرخزانہ پارے کہ بروک آ ہفتہ ٹی روپئی آ زور کم مریک‘ ہرانا سوب دادے کہ حکومت درآمد آتے کم کننگ اٹ سرسہب مسنے۔

(آن لائن)